کراچی: منگھوپیر ٹاؤن میں انسدادِ پولیو مہم کا باضابطہ آغاز کر دیا گیا، جس کا افتتاح چیئرمین منگھوپیر ٹاؤن حاجی نواز علی بروہی نے کیا۔ یہ مہم سندھ حکومت اور عالمی ادارہ صحت (WHO) کے باہمی تعاون سے چلائی جا رہی ہے، جس کا مقصد علاقے کے تمام بچوں کو موذی مرض پولیو سے محفوظ بنانا ہے۔ افتتاحی تقریب میں ٹاؤن انتظامیہ، محکمہ صحت کے افسران، سماجی کارکنان، معززینِ علاقہ اور میڈیا نمائندگان نے شرکت کی۔ اس موقع پر حاجی نواز علی بروہی نے خطاب کرتے ہوئے کہا کہ پولیو ایک مہلک بیماری ہے جو بچوں کو زندگی بھر کے لیے معذور کر سکتی ہے، لیکن اس کا بروقت اور واحد حل ویکسینیشن ہے۔
انہوں نے والدین سے اپیل کی کہ وہ اس قومی مہم میں بھرپور تعاون کریں اور اپنے پانچ سال سے کم عمر تمام بچوں کو انسدادِ پولیو کے قطرے لازمی پلوائیں تاکہ ملک کو اس بیماری سے ہمیشہ کے لیے نجات دلائی جا سکے۔ انہوں نے مزید کہا کہ سندھ حکومت اور عالمی ادارہ صحت کے اشتراک سے یہ مہم بھرپور طریقے سے چلائی جا رہی ہے، جس کے تحت تربیت یافتہ طبی عملہ گھر گھر جا کر بچوں کو پولیو ویکسین پلائے گا۔ ساتھ ہی ساتھ، ٹاؤن انتظامیہ اس مہم کی سخت نگرانی کرے گی تاکہ کوئی بھی بچہ ویکسین سے محروم نہ رہے۔
حاجی نواز علی بروہی نے واضح کیا کہ عوامی فلاح و بہبود کے منصوبے ان کی اولین ترجیح ہیں اور صحت عامہ کے ہر اقدام میں منگھوپیر ٹاؤن انتظامیہ اپنی خدمات بھرپور طریقے سے سرانجام دے گی۔ انہوں نے والدین، اساتذہ، سماجی کارکنان اور علمائے کرام سے بھی اپیل کی کہ وہ عوام میں شعور اجاگر کرنے میں اپنا کردار ادا کریں تاکہ پولیو جیسے موذی مرض کا مکمل خاتمہ ممکن ہو سکے۔ انہوں نے ٹیموں کی حفاظت اور کام کی سہولت کے لیے سیکیورٹی اداروں اور دیگر متعلقہ حکام کو بھی ہدایات جاری کیں۔
آخر میں، چیئرمین نے انسدادِ پولیو ٹیموں کی محنت کو سراہتے ہوئے انہیں مکمل تعاون اور ہر ممکن سہولت فراہم کرنے کی یقین دہانی کرائی اور امید ظاہر کی کہ ان کوششوں سے پاکستان جلد پولیو فری ممالک کی فہرست میں شامل ہو جائے گا۔
اس موقع پر میونسپل کمشنر آغا خلیق، وائس چیئرمین رانا محمد عارف ،ڈسٹرک ویسٹ کے صدر عابد ستی، انفارمیشن سیکریٹری علی اکبر کاچھیلو، اے ڈبل ای آفاق عالم، سب انجینیئر جنید صدیقی، علاقائی معززین اور دیگر بھی موجود تھے