چیئرمین منگھوپیر ٹاؤن کا یوسی 2 کا دورہ، صفائی عمل بلا تعطل جاری رکھنے کی ہدایات
کراچی: یونین کونسل 2، مون سٹی میں سیوریج کے طویل عرصے سے جاری مسائل کے مستقل حل کے لیے ایک مربوط اور مؤثر آپریشن بھرپور انداز میں جاری ہے، جس کے تحت بند نکاسیٔ آب کی لائنوں کو مرحلہ وار بحال کیا جا رہا ہے تاکہ جمع شدہ گندا پانی فوری طور پر خارج ہو سکے اور علاقے کے مکینوں کو درپیش مشکلات کا خاتمہ یقینی بنایا جا سکے۔
اس موقع پر چیئرمین منگھوپیر ٹاؤن حاجی نواز علی بروہی خود فیلڈ میں موجود رہے، جہاں انہوں نے نہ صرف جاری کام کا تفصیلی جائزہ لیا بلکہ عملے کی براہِ راست رہنمائی بھی کی، جس کے نتیجے میں کام کی رفتار اور معیار میں نمایاں بہتری دیکھنے میں آئی۔
اس آپریشن کی نمایاں خصوصیت یہ رہی کہ یہ سرگرمیاں محض دفتری اوقات تک محدود نہیں رہیں بلکہ چیئرمین منگھوپیر ٹاؤن حاجی نواز علی بروہی خود رات گئے تک موقع پر موجود رہے اور صفائی کے عمل کو بلا تعطل جاری رکھنے کی ہدایات دیتے رہے۔ رات بھر جاری رہنے والے اس عمل کے بعد وہ صبح کے اوقات میں بھی دوبارہ موقع پر پہنچے اور مجموعی صورتحال کا باریک بینی سے جائزہ لیا، تاکہ کسی بھی ممکنہ رکاوٹ یا کمی کو فوری طور پر دور کیا جا سکے۔ ان کی مسلسل موجودگی نے نہ صرف عملے کے حوصلے بلند کیے بلکہ کام کو مزید تیز، منظم اور مؤثر بنانے میں اہم کردار ادا کیا۔
سیوریج لائنوں کی صفائی کے دوران جدید مشینری کے ساتھ ساتھ دستی وسائل کو بھی مؤثر انداز میں بروئے کار لایا جا رہا ہے، جبکہ نکاسیٔ آب کے نظام میں رکاوٹ بننے والے ملبے اور کچرے کو فوری طور پر ہٹا کر روانی بحال کی جا رہی ہے۔ مزید برآں، متعلقہ ٹیموں کو واضح ہدایات جاری کی گئی ہیں کہ صفائی کے بعد بھی علاقے کی مسلسل نگرانی کو یقینی بنایا جائے، تاکہ مستقبل میں اس نوعیت کے مسائل دوبارہ جنم نہ لے سکیں۔
علاقہ مکینوں نے اس عملی اور مؤثر اقدام کو سراہتے ہوئے اطمینان کا اظہار کیا ہے کہ طویل عرصے بعد ان کے مسائل پر سنجیدگی کے ساتھ توجہ دی جا رہی ہے، جہاں چیئرمین منگھوپیر ٹاؤن حاجی نواز علی بروہی خود میدان میں موجود ہو کر مسائل کے حل کے لیے متحرک کردار ادا کر رہے۔ یہ اقدام اس عزم کا واضح اظہار ہے کہ شہریوں کو صاف، محفوظ اور بہتر ماحول فراہم کرنے کے لیے ہر ممکن وسائل بروئے کار لائے جا رہے ہیں، اور اس مقصد کے حصول تک یہ سلسلہ پوری سنجیدگی اور تسلسل کے ساتھ جاری رکھا جائے گا۔