پاکستان اپنی سرزمین پر بیرونی دہشتگردی کو ہر قیمت پر ختم کرنے کیلیے پُرعزم ہے:وزیراعظم
کراچی: وزیراعظم شہباز شریف نے کہا ہے کہ پاکستان اپنی سرزمین پر بیرونی دہشت گردی کو ہر قیمت پر ختم کرنے کے لیے پُرعزم ہے۔
پاک بحریہ کی پاسنگ آؤٹ پریڈ سے خطاب کرتے ہوئے وزیراعظم شہباز شریف نے پاس ہونے والے کیڈٹس کو مبارکباد پیش کی اور دوست ممالک کے کیڈٹس کی موجودگی کو خوش آئند قرار دیا۔
انہوں نے ملکی دفاع میں پاک بحریہ کے شاندار کردار کو سراہتے ہوئے کہا کہ پاکستان نیوی نے ہر مشکل گھڑی میں سرخروئی حاصل کی ہے۔ انہوں نے کہا کہ معرکہ حق میں پاک بحریہ کا کردار تاریخ کا حصہ ہے۔
ایران اور امریکا کے مابین حالیہ مفاہمت پر اظہارِ خیال کرتے ہوئے انہوں نے کہا کہ اسلام آباد معاہدے پر دستخط پاکستان کے لیے بڑے اعزاز کی بات ہے۔ ایرانی صدر کا دورہ دونوں ممالک کے مابین برادرانہ تعلقات اور پاکستان کی علاقائی اہمیت کو تسلیم کرنے کا ثبوت ہے۔
وزیراعظم نے اس کامیابی کا سہرا پاکستان کی مخلصانہ سفارتی کوششوں کے سر باندھا اور قیامِ امن کے لیے فیلڈ مارشل، آرمی چیف جنرل عاصم منیر کی انتھک محنت کو سراہا۔
وزیراعظم شہباز شریف نے مزید کہا کہ خطے میں رونما ہونے والی بڑی تبدیلیاں دُور رس اثرات کی حامل ہوں گی۔ مشرقی ہمسایہ ملک شکست خوردہ ذہنیت کے تحت پراکسیز کا سہارا لے رہا ہے، تاہم پاکستان بیرونی سرپرستی میں ہونے والی دہشت گردی کو جڑ سے اکھاڑ پھینکنے کے لیے اپنی افواج کے ساتھ مکمل پرعزم ہے۔ایرانی صدر مسعود پزشکیان کا دورہ پاکستان دونوں ممالک کے درمیان گہرے برادرانہ تعلقات اور پاکستان کی علاقائی اہمیت کو تسلیم کرنے کا منہ بولتا ثبوت ہے۔