صدر ٹاؤن کے زیرِ اہتمام صدر آڈیٹوریم میں یومِ دفاع پاکستان کے حوالے سے ایک پروقار اور شاندار تقریب کا انعقاد
کراچی: صدر ٹاؤن کے زیرِ اہتمام صدر ٹاؤن آڈیٹوریم میں یومِ دفاع پاکستان کے حوالے سے ایک پروقار اور شاندار تقریب کا انعقاد کیا گیا، جس میں صدر ٹاؤن کے مختلف اسکولوں کے طلبہ و طالبات نے بھرپور شرکت کی۔ تقریب کے دوران طلبہ و طالبات نے مختلف موضوعات پر مبنی خوبصورت ٹیبلوز، ملی نغمے، تقاریر اور دیگر پیشکشوں کے ذریعے وطنِ عزیز سے اپنی محبت اور قومی جذبے کا اظہار کیا۔
تقریب کے مہمانِ خصوصی میونسپل کمشنر صدر ٹاؤن ذیشان صالح تھے۔ اس موقع پر طلبہ و طالبات نے 6 ستمبر یومِ دفاع پاکستان کی مناسبت سے پاک فوج کے جوانوں، شہداء اور قومی ہیروز کی قربانیوں کو خراجِ عقیدت پیش کیا۔ مختلف اسکولوں کے بچوں کی جانب سے پیش کیے گئے ٹیبلوز میں وطن سے محبت، قومی یکجہتی، بہادری، قربانی اور ملکی دفاع کے جذبے کو اجاگر کیا گیا، جسے شرکاء نے بے حد سراہا۔
تقریب سے خطاب کرتے ہوئے میونسپل کمشنر صدر ٹاؤن ذیشان صالح نے کہا کہ یومِ دفاع پاکستان ہمیں اپنے ان بہادر سپوتوں کی لازوال قربانیوں کی یاد دلاتا ہے جنہوں نے وطن کے دفاع کے لیے اپنی جانوں کا نذرانہ پیش کیا۔ انہوں نے کہا کہ پاکستان کی تاریخ قربانی، عزم اور بہادری کی روشن مثالوں سے بھری ہوئی ہے اور ہماری نوجوان نسل کو اپنے قومی ہیروز کی قربانیوں اور جدوجہد سے آگاہ کرنا وقت کی اہم ضرورت ہے۔
انہوں نے کہا کہ طلبہ و طالبات ملک کا مستقبل ہیں اور ان میں حب الوطنی، نظم و ضبط، اتحاد اور قومی ذمہ داری کا شعور اجاگر کرنا ہم سب کی مشترکہ ذمہ داری ہے۔ انہوں نے صدر ٹاؤن کے مختلف اسکولوں کے بچوں کی جانب سے پیش کیے گئے ٹیبلوز اور دیگر پروگرامز کو سراہتے ہوئے کہا کہ بچوں نے اپنی بہترین صلاحیتوں کا مظاہرہ کرتے ہوئے یومِ دفاع کے حقیقی پیغام کو اجاگر کیا ہے۔
میونسپل کمشنر ذیشان صالح نے مزید کہا کہ یومِ دفاع ہمیں یہ پیغام دیتا ہے کہ قومیں اتحاد، نظم و ضبط اور عزمِ صمیم کے ذریعے مشکلات کا مقابلہ کرتی ہیں۔ انہوں نے کہا کہ ہمیں اپنے شہداء کی قربانیوں کو ہمیشہ یاد رکھتے ہوئے پاکستان کی ترقی، خوشحالی اور استحکام کے لیے اپنا کردار ادا کرنا چاہیے۔
تقریب کے دوران مختلف اسکولوں کے طلبہ و طالبات نے ملی نغمے اور ٹیبلوز پیش کیے، جن میں وطنِ عزیز کی محبت، دفاعِ پاکستان، شہداء کی قربانیاں اور قومی اتحاد کو اجاگر کیا گیا۔ بچوں کی پُرجوش اور دلکش پیشکشوں پر آڈیٹوریم میں موجود شرکاء نے بھرپور داد دی۔