چیئرمین ٹاؤن میونسپل کارپوریشن منگھوپیر حاجی نواز علی بروہی سے ہمدرد یونیورسٹی کے وفد کی ملاقات
کراچی: چیئرمین ٹاؤن میونسپل کارپوریشن منگھوپیر حاجی نواز علی بروہی سے ہمدرد یونیورسٹی کی انتظامیہ نے ایک تفصیلی اور اہم ملاقات کی۔ اس نشست میں یونیورسٹی کو درپیش انتظامی چیلنجز، خصوصاً ملازمین و لیبر کے دیرینہ مسائل پر تفصیلی غور و خوض کیا گیا۔ اس ملاقات میں پاکستان پیپلز پارٹی کے مقامی رہنماؤں نے خصوصی شرکت کی، تاکہ مسائل کو باہمی مشاورت سے حل کرنے کا لائحہ عمل طے کیا جا سکے۔
ملاقات کے دوران ٹاؤن چیئرمین حاجی نواز علی بروہی کے ہمراہ پاکستان پیپلز پارٹی کے ممتاز رہنما خلیفہ میر محمد، کونسل ممبر کوثر اقبال اور کونسلر سلیم نے بھرپور شرکت کی۔ ہمدرد یونیورسٹی کی انتظامیہ نے ٹاؤن چیئرمین اور پی پی پی کے وفد کا پرتپاک استقبال کیا اور انہیں یونیورسٹی کے جاری امور پر بریفنگ دی۔
اس موقع پر ہمدرد یونیورسٹی کی انتظامیہ نے ٹاؤن چیئرمین حاجی نواز علی بروہی کی جانب سے علاقے میں کروائے جانے والے ریکارڈ ترقیاتی کاموں اور ان کی عوامی خدمات کو زبردست الفاظ میں سراہا۔ انتظامیہ نے اس عزم کا اظہار کیا کہ حاجی نواز علی بروہی کی قیادت میں یونیورسٹی اور اس کے گردونواح کے تعلیمی و شہری ماحول میں نمایاں بہتری آئے گی۔
ملاقات کا سب سے اہم نکتہ یونیورسٹی کے لیبر طبقے کے مسائل تھے۔ ٹاؤن چیئرمین حاجی نواز علی بروہی نے یونیورسٹی انتظامیہ کو یقین دہانی کرائی کہ لیبر کے جائز مطالبات اور مسائل کو ترجیحی بنیادوں پر حل کیا جائے گا۔ ٹاؤن چیئرمین کا کہنا تھا کہ "تعلیمی اداروں کا وقار اور وہاں کام کرنے والے محنت کشوں کے حقوق کا تحفظ ہم سب کی اجتماعی ذمہ داری ہے، اور ان شاء اللہ اس ضمن میں تمام رکاوٹوں کو جلد دور کر دیا جائے گا۔”
یونیورسٹی انتظامیہ نے ٹاؤن چیئرمین اور پاکستان پیپلز پارٹی کے وفد کی مخلصانہ کوششوں اور بروقت یقین دہانی پر شکریہ ادا کیا اور مستقبل میں بھی باہمی تعاون کو جاری رکھنے پر اتفاق کیا۔