کشمیری عوام کی جدوجہد اور قربانیوں کو فراموش نہیں کیا جاسکتا: عبدالجمیل خان
کراچیض: 27 اکتوبر یومِ سیاہ کشمیر کے موقع پر لانڈھی ٹاؤن کے زیرِ اہتمام کشمیری عوام سے اظہارِ یکجہتی کے لیے واک کا انعقاد کیا گیا، جس کی قیادت چیئرمین لانڈھی ٹاؤن عبدالجمیل خان نے کی۔ واک میں وائس چیئرمین محمد عمران، میونسپل کمشنر محمد نواز مہر، بلدیاتی نمائندوں، افسران اور دیگر افراد نے شرکت کی۔
اس موقع پر خطاب کرتے ہوئے چیئرمین لانڈھی ٹاؤن عبدالجمیل خان نے کہا کہ 27 اکتوبر 1947ء کشمیر کی تاریخ کا ایک اہم اور المناک دن ہے، جب بھارتی فوجیں کشمیر میں داخل ہوئیں۔ کشمیری عوام گزشتہ کئی دہائیوں سے اپنے حقِ خودارادیت کے حصول کے لیے جدوجہد کررہے ہیں۔ ان کی قربانیاں اور جدوجہد عالمی برادری کی توجہ کی مستحق ہیں۔
عبدالجمیل خان نے کہا کہ مسئلہ کشمیر محض دو ممالک کے درمیان تنازع نہیں بلکہ لاکھوں کشمیریوں کے سیاسی مستقبل اور بنیادی انسانی حقوق کا مسئلہ ہے۔ اقوام متحدہ کی قراردادوں کے مطابق کشمیری عوام کو اپنے مستقبل کے فیصلے کا حق ملنا چاہیے۔
انہوں نے کہا کہ کشمیری عوام نے طویل عرصے سے مشکلات اور قربانیوں کا سامنا کیا ہے۔ عالمی برادری کی ذمہ داری ہے کہ وہ مقبوضہ کشمیر میں انسانی حقوق کی صورتحال کا نوٹس لے اور مسئلے کے پُرامن اور منصفانہ حل کے لیے مؤثر کردار ادا کرے۔
چیئرمین لانڈھی ٹاؤن نے کہا کہ پاکستان کے عوام کشمیریوں کے حقِ خودارادیت کی حمایت کرتے ہیں۔ یومِ سیاہ منانے کا مقصد دنیا کو مسئلہ کشمیر کی تاریخی حقیقت اور کشمیری عوام کی جدوجہد کی یاد دہانی کرانا ہے۔
عبدالجمیل خان نے مزید کہا کہ کشمیر کے مسئلے کا پائیدار حل خطے میں امن و استحکام کے لیے ناگزیر ہے۔ کشمیری عوام کی امنگوں اور اقوام متحدہ کی متعلقہ قراردادوں کو سامنے رکھتے ہوئے بامعنی اقدامات کیے جانے چاہئیں۔
واک کے اختتام پر کشمیری عوام کے ساتھ اظہارِ یکجہتی کیا گیا اور ان کے لیے امن، سلامتی اور حقِ خودارادیت کی دعا کی گئی۔