چیئرمین منگھوپیر ٹاؤن نے حمزہ گوٹھ یوسی 2 میں پیور بلاک کی تنصیب کا کام کا جائزہ لیا
کراچی: ٹاؤن میونسپل کارپوریشن منگھوپیر کی جانب سے شہر کے مختلف علاقوں میں بنیادی شہری سہولیات کی فراہمی، انفراسٹرکچر کی بہتری اور عوامی مسائل کے حل کے لیے ترقیاتی کام بھرپور انداز میں جاری ہیں۔ اسی سلسلے میں حمزہ گوٹھ یوسی ۲ میں پیور بلاک کی تنصیب کا کام تیزی سے جاری ہے، جس کا چیئرمین ٹاؤن میونسپل کارپوریشن منگھوپیر حاجی نواز علی بروہی نے موقع پر پہنچ کر تفصیلی معائنہ کیا۔
چیئرمین ٹاؤن میونسپل کارپوریشن منگھوپیر حاجی نواز علی بروہی نے حمزہ گوٹھ میں جاری پیور بلاک کی تنصیب کے کام کا جائزہ لیا اور موقع پر موجود متعلقہ افسران و عملے سے منصوبے کی پیش رفت، استعمال ہونے والے میٹریل اور کام کے معیار کے حوالے سے تفصیلی بریفنگ حاصل کی۔ اس موقع پر انہوں نے پیور بلاک کے معیار، مضبوطی اور تنصیب کے طریقۂ کار کا خود بھی جائزہ لیا اور متعلقہ افسران کو ہدایت کی کہ ترقیاتی کام میں معیار پر کسی قسم کا سمجھوتہ نہ کیا جائے۔
حاجی نواز علی بروہی نے کہا کہ عوامی سہولیات کے لیے شروع کیے جانے والے ترقیاتی منصوبوں میں معیار ہماری اولین ترجیح ہے۔ عوام کے لیے کیے جانے والے ہر کام کو مضبوط، پائیدار اور دیرپا ہونا چاہیے تاکہ شہریوں کو طویل عرصے تک اس کا فائدہ حاصل ہو۔ انہوں نے متعلقہ افسران کو ہدایت کی کہ پیور بلاک کی کوالٹی، موٹائی، مضبوطی اور تنصیب کے تمام مراحل کی باقاعدہ نگرانی کی جائے اور کوالٹی کنٹرول کے اصولوں پر مکمل عملدرآمد یقینی بنایا جائے۔
انہوں نے کہا کہ پیور بلاک کی تنصیب کا مقصد صرف علاقے کی خوبصورتی میں اضافہ کرنا نہیں بلکہ شہریوں کو بہتر، محفوظ اور پائیدار راستے کی سہولت فراہم کرنا بھی ہے۔ اس لیے کام کی تکمیل تک اس کے معیار کی مسلسل نگرانی کی جائے گی تاکہ منصوبہ مقررہ معیار کے مطابق مکمل ہو۔
چیئرمین منگھوپیر ٹاؤن حاجی نواز علی بروہی نے سندھ حکومت کے تعاون کو سراہتے ہوئے کہا کہ صوبائی حکومت کی جانب سے منگھوپیر ٹاؤن کی ترقی اور عوامی مسائل کے حل کے لیے جو تعاون کیا جا رہا ہے، وہ قابلِ تحسین ہے۔ انہوں نے سندھ حکومت سے اپیل کی کہ منگھوپیر ٹاؤن کے عوام کی بڑھتی ہوئی ضروریات کو مدنظر رکھتے ہوئے ترقیاتی منصوبوں کے لیے مزید تعاون کیا جائے تاکہ ٹاؤن کے مختلف علاقوں میں مزید بڑے اور معیاری منصوبے شروع کیے جا سکیں۔
انہوں نے کہا کہ سندھ حکومت کے تعاون سے منگھوپیر ٹاؤن میں ترقیاتی سرگرمیوں کو مزید وسعت دی جا سکتی ہے اور عوام کو بنیادی شہری سہولیات کی فراہمی میں نمایاں بہتری لائی جا سکتی ہے۔ ہم چاہتے ہیں کہ منگھوپیر ٹاؤن کے ہر علاقے میں ایسے منصوبے مکمل کیے جائیں جو عوام کے لیے حقیقی معنوں میں فائدہ مند، مضبوط اور دیرپا ثابت ہوں۔
حاجی نواز علی بروہی نے مزید کہا کہ منگھوپیر ٹاؤن کی تعمیر و ترقی ایک مسلسل عمل ہے اور عوام کو بہتر شہری سہولیات کی فراہمی کے لیے ٹاؤن انتظامیہ اپنی تمام تر صلاحیتیں بروئے کار لا رہی ہے۔ سڑکوں، گلیوں، فٹ پاتھوں، پیور بلاک اور دیگر بنیادی سہولیات سے متعلق ترقیاتی کاموں کو مرحلہ وار آگے بڑھایا جا رہا ہے، جبکہ جاری منصوبوں کے معیار اور رفتار پر خصوصی توجہ دی جا رہی ہے۔
انہوں نے کہا کہ عوامی مسائل کا حل اور منگھوپیر ٹاؤن کی تعمیر و ترقی ہماری اولین ترجیحات میں شامل ہے، ترقیاتی منصوبوں میں شفافیت، معیار اور پائیداری کو ہر صورت یقینی بنایا جائے گا۔
اس موقع پر ٹاؤن میونسپل کارپوریشن منگھوپیر کے متعلقہ افسران، انجینئرنگ و کوالٹی کنٹرول سے وابستہ عملہ اور دیگر افسران بھی چیئرمین حاجی نواز علی بروہی کے ہمراہ موجود تھے۔ چیئرمین نے افسران کو جاری ترقیاتی کاموں کی مسلسل نگرانی، معیار کی جانچ اور کام کو مقررہ معیار کے مطابق بروقت مکمل کرنے کے حوالے سے ضروری ہدایات بھی جاری کیں۔