کراچی: گورنر کے پی کے فیصل کریم کنڈی نے 24 اکتوبر کو کے پی ٹی فٹ بال اسٹیڈیم میں پی او اے انوائرمنٹ کمیشن کی شجر کاری کی تقریب اور ساتویں نیشنل مینز سافٹ بال چیمپئن شپ 2024 میں بطور مہمان خصوصی شرکت کی۔
تقریب میں میڈیا کے نمائندوں سے خطاب کرتے ہوئے گورنر نے کھیل اور تعلیم کو ملک کے مثبت امیج کو فروغ دینے کے لیے اہم قرار دیا۔ مزید برآں انہوں نے کھیلوں میں خواتین اور نوجوانوں کی شرکت کو سراہا اور اسے ملکی ترقی کے لیے نیک شگون قرار دیا۔
گورنر نے تمام کھیلوں کی اہمیت پر زور دیتے ہوئے کہا کہ کرکٹ ملک میں ایک مقبول کھیل ہے اور اس کی حمایت کی جانی چاہیے لیکن دیگر کھیلوں کو بھی اہمیت دی جانی چاہیے۔ انہوں نے مزید کہا کہ 18ویں ترمیم کے بعد مختلف کھیلوں کو سپورٹ کرنا صوبائی فرض ہے۔ گورنر نے کے پی کے کی ٹیم کو ایونٹ میں دیکھ کر خوشی کا اظہار کیا اور اپنے صوبے میں پی ایس ایل میچز سمیت اس طرح کے ٹورنامنٹس کا اہتمام کرانے کا عزم کیا۔
کے پی کے کے بارے میں بات کرتے ہوئے انہوں نے افسوس کا اظہار کیا کہ کے پی کے کے ساتھ منفی تاثرات جڑے ہوئے ہیں لیکن ہمارا مقصد کھیلوں کی تقریبات کے ذریعے اس تاثر کو تبدیل کرنا ہے اور اس کے لیے ہم کے پی کے کے وزیراعلیٰ علی امین گنڈو پور سمیت پارلیمنٹرینز کو دوستانہ میچ کھیلنے کی دعوت دیں گے۔ انہوں نے مزید کہا کہ وہ سیاسی اختلافات کو ایک طرف رکھ کر صوبے کی بہتری کے لیے کے پی کے کے وزیراعلیٰ علی امین گنڈو پور کے ساتھ مل کر کام کرنے کا ارادہ رکھتے ہیں۔ تقریب کے اختتام پر گورنر نے سٹیڈیم میں ایک پودا لگایا۔