چیئرمین جناح ٹاؤن رضوان عبد السمیع نے الہلال سوسائٹی میں الخدمت واٹر فلٹریشن پلانٹ کا افتتاح کردیا
کراچی: چیئرمین جناح ٹاؤن رضوان عبد السمیع نے یوسی نمبر 7 کی الہلال سوسائٹی میں الخدمت فاؤنڈیشن کے زیرِ اہتمام قائم جدید واٹر فلٹریشن پلانٹ کا افتتاح کر دیا۔ افتتاحی تقریب میں یوسی نمبر 7 کے چیئرمین سلیم عمر کپاڈیہ، جماعت اسلامی کے مقامی عہدیداران، سماجی و فلاحی شخصیات، معززینِ علاقہ اور شہریوں کی بڑی تعداد نے شرکت کی۔ شرکاء نے اس منصوبے کو عوام کو صاف، محفوظ اور معیاری پینے کے پانی کی فراہمی کی جانب ایک اہم فلاحی اقدام قرار دیا۔
افتتاحی تقریب سے خطاب کرتے ہوئے چیئرمین جناح ٹاؤن رضوان عبد السمیع نے کہا کہ صاف اور محفوظ پینے کے پانی تک رسائی ہر شہری کا بنیادی حق ہے اور اس حق کی فراہمی ریاستی و سماجی اداروں کی مشترکہ ذمہ داری ہے۔ انہوں نے کہا کہ الخدمت جیسے فلاحی ادارے عوامی خدمت کے میدان میں قابلِ قدر کردار ادا کر رہے ہیں، جن کے تعاون سے معاشرے کے محروم طبقات کو بنیادی سہولیات کی فراہمی ممکن ہو رہی ہے۔ انہوں نے کہا کہ ایسے منصوبے نہ صرف عوامی زندگی میں آسانیاں پیدا کرتے ہیں بلکہ صحتِ عامہ کے تحفظ اور بیماریوں کی روک تھام میں بھی اہم کردار ادا کرتے ہیں۔
چیئرمین جناح ٹاؤن نے کہا کہ بلدیاتی اداروں اور فلاحی تنظیموں کے درمیان مضبوط اشتراک ہی شہری مسائل کے دیرپا اور مؤثر حل کی ضمانت ہے۔ انہوں نے اس عزم کا اظہار کیا کہ جناح ٹاؤن کی حدود میں عوامی فلاح، بنیادی شہری سہولیات کی فراہمی اور خدمتِ خلق کے منصوبوں کی ہر ممکن سرپرستی جاری رکھی جائے گی تاکہ شہریوں کو بہتر اور باوقار طرزِ زندگی میسر آ سکے۔
تقریب کے اختتام پر چیئرمین جناح ٹاؤن نے واٹر فلٹریشن پلانٹ کا تفصیلی معائنہ کیا، انتظامات پر اطمینان کا اظہار کیا اور الخدمت کی خدمات کو سراہتے ہوئے متعلقہ ذمہ داران کو مبارکباد پیش کی۔ انہوں نے امید ظاہر کی کہ اس منصوبے سے الہلال سوسائٹی اور ملحقہ علاقوں کے ہزاروں مکینوں کو مسلسل صاف، معیاری اور محفوظ پینے کا پانی دستیاب ہوگا، جس سے ان کی صحت اور معیارِ زندگی میں مثبت بہتری آئے گی۔