نیوکراچی ٹاؤن میں ترقیاتی کاموں کا سلسلہ جاری، میونسپل کمشنر کا سڑک کی کارپیٹنگ کا معائنہ
کراچی: نیو کراچی ٹاؤن میں عوامی سہولیات کی بہتری اور ترقیاتی منصوبوں پر تیزی سے کام جاری ہے۔ اسی سلسلے میں میونسپل کمشنر عبدالجبار مہر نے سیکٹر 11-I، سیلم سینٹر میں تعمیر ہونے والی سڑک کی کارپیٹنگ کے جاری کام کا تفصیلی معائنہ کیا۔
اس موقع پر وائس چیئرمین نیو کراچی ٹاؤن شعیب بن ظہیر، ٹاؤن کے متعلقہ افسران اور دیگر ذمہ داران بھی ان کے ہمراہ موجود تھے۔ میونسپل کمشنر نے منصوبے کی رفتار، معیار اور تعمیراتی مراحل کا جائزہ لیتے ہوئے متعلقہ افسران کو ہدایت کی کہ کام کو مقررہ مدت میں اعلیٰ معیار کے ساتھ مکمل کیا جائے تاکہ عوام جلد از جلد اس سہولت سے مستفید ہو سکیں۔
معائنے کے دوران عبدالجبار مہر نے کہا کہ "شہریوں کو بہتر، محفوظ اور معیاری سڑکوں کی فراہمی ہماری اولین ترجیح ہے۔ سیلم سینٹر کی یہ سڑک مکمل ہونے سے نہ صرف ٹریفک کی روانی بہتر ہوگی بلکہ مقامی رہائشیوں اور کاروباری طبقے کو بھی نمایاں سہولت حاصل ہوگی۔”
انہوں نے مزید کہا کہ "نیو کراچی ٹاؤن میں جاری تمام ترقیاتی منصوبوں کی مسلسل نگرانی کی جا رہی ہے تاکہ عوام کے ٹیکس کا ہر روپیہ شفاف انداز میں خرچ ہو اور پائیدار ترقی کو یقینی بنایا جا سکے۔ ہماری کوشش ہے کہ ہر یونین کونسل میں ایسے منصوبے مکمل کیے جائیں جو شہریوں کے معیارِ زندگی میں حقیقی بہتری لائیں اور علاقے کی ترقی میں سنگِ میل ثابت ہوں۔”
بعد ازاں میونسپل کمشنر نے متعلقہ افسران کو ہدایت کی کہ تعمیراتی کام کے دوران معیار پر کسی قسم کا سمجھوتہ نہ کیا جائے اور منصوبے کی بروقت تکمیل کو یقینی بنایا جائے تاکہ عوام کو جلد از جلد بہترین سفری سہولیات میسر آ سکیں۔