محکمہ لائیو اسٹاک کی جانب سے مارکۂ حق جشن آزادی بوٹ ریلی کا انعقاد
کراچی: مارکۂ حق اور یومِ آزادی 2025 کے موقع پر صوبائی وزیر لائیو اسٹاک اینڈ فشریز محمد علی ملکانی کی قیادت میں ایک شاندار بوٹ ریلی کا انعقاد کیا گیا، جس کا مقصد قومی جذبے کو اُجاگر کرنا اور آزادی کی اہمیت کو اجاگر کرنا ہے
بوٹ ریلی میں خصوصی معاونین برائے وزیراعلیٰ سندھ حسین اسلام بھٹی اور آصف خان، سیکریٹری لائیو اسٹاک ڈاکٹر کاظم حسین جتوئی، ایم ڈی فش ہاربر زاہد کھیمٹیو، ڈپٹی کمشنر کیماڑی طارق چانڈیو، ایڈیشنل سیکریٹری اور ڈائریکٹرز سمیت محکمہ لائیو اسٹاک و فشریز کے افسران نے شرکت کی۔
اس موقع پر ماہی گیروں کی بڑی تعداد بھی موجود تھی جبکہ بڑی تعداد میں کشتیاں ریلی میں شامل ہوئیں
میڈیا سے گفتگو کرتے ہوئے صوبائی وزیر محمد علی ملکانی نے کہا کہ "ہر سال کی طرح اس سال بھی بوٹ ریلی کا انعقاد جوش و جذبے سے کیا گیا ہے۔ چند ماہ قبل بھارت نے حملہ کرکے جنگ کی ابتدا کی تھی، لیکن ہماری مسلح افواج نے دشمن کو منہ توڑ جواب دیا۔ پاکستان کی عوام ہمیشہ اپنی مسلح افواج کے شانہ بشانہ کھڑی ہے۔ اس سال ہم نہ صرف آزادی کا جشن منا رہے ہیں بلکہ معرکۂ حق کی فتح بھی جوش و جذبے سے یاد کر رہے ہیں۔”
انہوں نے مزید کہا کہ "ان شاء اللہ عوام جلد بہتری دیکھے گی اور ہم غربت کے خاتمے کی جنگ بھی جیتیں گے۔ سمندر کی صفائی کے لیے محکمہ مسلسل کام کر رہا ہے۔ یہ بات درست ہے کہ سمندر میں کچرا موجود ہے، لیکن اس کے حل کے لیے ٹریٹمنٹ پلانٹس پر کام جاری ہے، جس سے سمندری ماحول میں نمایاں بہتری آئے گی۔”
صوبائی وزیر نے کہا کہ "پاکستان پیپلز پارٹی نے ہمیشہ صحت کے شعبے پر خصوصی توجہ دی ہے، اب حیات کے تحفظ کی ذمہ داری حکومت کی ہے اور ہم اس فرض کو پوری ذمہ داری سے نبھا رہے ہیں۔”