منگھوپیر ٹاؤن انتظامیہ نے یوسی 14 میں نالے کی صفائی، مرمت اور کور کی تنصیب کا کام مکمل کر لیا
کراچی: منگھوپیر ٹاؤن کی یونین کونسل نمبر 14 میں دیرینہ عوامی مسئلے کے حل کے لیے ایک جامع، منظم اور مؤثر آپریشن کے تحت نالے کی مکمل صفائی، مرمت اور اس کے اوپر مضبوط حفاظتی سلیب (کور) کی تنصیب کا کام کامیابی کے ساتھ مکمل کر لیا گیا ہے۔ یہ اہم ترقیاتی منصوبہ چیئرمین منگھوپیر ٹاؤن حاجی نواز علی بروہی کی خصوصی ہدایات، ذاتی دلچسپی اور مسلسل نگرانی کے باعث پایۂ تکمیل کو پہنچا، جو عوامی خدمت کے جذبے اور عملی اقدامات کا واضح ثبوت ہے۔
تفصیلات کے مطابق، یوسی 14 میں واقع یہ نالہ طویل عرصے سے صفائی نہ ہونے، کچرے کے انبار اور ٹوٹ پھوٹ کا شکار ہونے کے باعث نکاسیٔ آب کے نظام میں بڑی رکاوٹ بن چکا تھا۔ گندا پانی سڑکوں اور گلیوں میں جمع ہو کر نہ صرف آمدورفت میں مشکلات پیدا کر رہا تھا بلکہ ماحولیاتی آلودگی اور وبائی امراض کے خدشات میں بھی اضافہ ہو رہا تھا۔ علاقہ مکینوں کی جانب سے بارہا نشاندہی کے بعد چیئرمین حاجی نواز علی بروہی نے فوری ایکشن لیتے ہوئے متعلقہ شعبوں کو ہنگامی بنیادوں پر کام شروع کرنے کی ہدایت جاری کی۔
اس منصوبے کے تحت نالے کی گہرائی تک مکمل صفائی کی گئی، رکاوٹوں کو دور کیا گیا، دیواروں اور بنیادوں کی مرمت کی گئی اور بعد ازاں نالے کے اوپر مضبوط اور معیاری سلیب (کور) نصب کیے گئے تاکہ نہ صرف گندگی کے پھیلاؤ کو روکا جا سکے بلکہ شہریوں کی جان و مال کا تحفظ بھی یقینی بنایا جا سکے۔ اس اقدام سے علاقے میں صفائی کی صورتحال میں نمایاں بہتری آئی ہے اور نکاسیٔ آب کا نظام بحال ہو گیا ہے۔
کام کی تکمیل کے موقع پر علاقہ مکینوں نے اپنی خوشی کا اظہار کرتے ہوئے شہریوں نے انہیں ہار پہنائے، پھولوں کی پتیاں نچھاور کیں اور ان کے حق میں نعرے لگائے۔ اس موقع پر لوگوں کا کہنا تھا کہ طویل عرصے بعد ان کے مسائل کو سنجیدگی سے حل کیا گیا ہے اور اس کام سے نہ صرف ان کی روزمرہ زندگی آسان ہوئی ہے بلکہ علاقے کی مجموعی صورتحال بھی بہتر ہوئی ہے۔
اس موقع پر چیئرمین کے ہمراہ صدر پاکستان پیپلز پارٹی ضلع ویسٹ عابد حسین ستی انفارمیشن سیکرٹری ڈسٹرکٹ ویسٹ علی اکبر کاچھیلو اور یوسی 14 کے وائس چیئرمین حبیب اللہ ثواتی بھی موجود تھے۔ انہوں نے موقع پر موجود رہ کر کام کا تفصیلی جائزہ لیا، عوام سے ملاقات کی اور ان کے مسائل و تجاویز کو سنا۔ رہنماؤں نے اس عزم کا اظہار کیا کہ منگھوپیر ٹاؤن میں ترقیاتی کاموں کا دائرہ مزید وسیع کیا جائے گا اور ہر یونین کمیٹی میں بلا امتیاز عوامی سہولیات کی فراہمی کو یقینی بنایا جائے گا۔
چیئرمین حاجی نواز علی بروہی نے اس موقع پر خطاب کرتے ہوئے کہا کہ عوامی خدمت ان کی اولین ترجیح ہے اور وہ خود ہر ترقیاتی منصوبے کی نگرانی کرتے ہیں تاکہ معیار اور شفافیت پر کوئی سمجھوتہ نہ ہو۔ انہوں نے کہا کہ نالوں کی صفائی، مرمت اور حفاظتی اقدامات شہری زندگی کے بنیادی تقاضے ہیں، جنہیں ہر صورت یقینی بنایا جائے گا، خصوصاً بارشوں کے موسم سے قبل ان اقدامات کی اہمیت مزید بڑھ جاتی ہے۔
انہوں نے مزید کہا کہ منگھوپیر ٹاؤن کو صاف، محفوظ اور مثالی بنانے کے لیے تمام دستیاب وسائل بروئے کار لائے جا رہے ہیں، اور یہ سلسلہ آئندہ بھی اسی جذبے اور رفتار کے ساتھ جاری رہے گا۔ آخر میں انہوں نے متعلقہ افسران و عملے کی کارکردگی کو سراہتے ہوئے ہدایت دی کہ صفائی اور نکاسیٔ آب کے نظام کی مستقل بنیادوں پر نگرانی کی جائے تاکہ شہریوں کو کسی بھی قسم کی پریشانی کا سامنا نہ کرنا پڑے۔یہ منصوبہ اس بات کا عملی ثبوت ہے کہ جب قیادت مخلص ہو اور نیت خدمت کی ہو تو عوامی مسائل کا حل ممکن ہوتا ہے، اور منگھوپیر ٹاؤن اسی وژن کے تحت ترقی کی راہ پر گامزن ہے۔