منیجنگ ڈائریکٹر، سوئی سدرن گیس کمپنی، عمران منیار نے صارفین کی شکایات کو تیزی سے حل کرنے کے لیے ادارے کے عزم کا اعادہ کیا باوجود اس حقیقت کہ طلب اور رسد کے بڑھتے ہوئے فرق کے باعث گیس کی فراہمی کو یقینی بنانے کے لئے سوئی سدرن کو مشکل چیلنجز کا سامنا ہے.
یہ بات انہوں نے پرائم منسٹر ڈلیوری یونٹ (PMDU) کی ہدایت پر منعقدہ سوئی سدرن کے ہیڈ آفس آڈیٹوریم میں کھلی کچہری (روبرو) اجلاس کی صدارت کرتے ہوئے کہی.
انہوں نے متعلقہ ڈیپارٹمنٹ کے سینئر ایگزیکٹوز کے ساتھ اس اجلاس کے لیے پہلے سے رجسٹرڈ صارفین کے گیس سے متعلق سوالات اور شکایات کو سنا اور ان کے جلد ازالے کا احکامات جاری کیے.
منیجنگ ڈائریکٹر کے ہمراہ ڈسٹری بیوشن اور کسٹمر سروسز کے سینئر مینجمنٹ حکام بھی موجود تھے جن میں ادیب الرحمان، ڈی جی ایم (ڈسٹری بیوشن – کراچی سینٹرل)، ندیم عزیز، ڈی ایم جی (ریکوری – کسٹمر سروسز)، اسماعیل دلوش، ڈی جی ایم (بلنگ – کسٹمر سروسز) اور جاوید ملک، اے ڈی جی ایم – (سیلز – کسٹمر سروسز) شامل تھے.کچہری کے اجلاس کے دوران ان افسران نے اپنے اپنے ڈیپارٹمنٹ سے متعلقہ سوالات کے جوابات دیئے. کارپوریٹ کمیونیکیشنز کے سربراہ سلمان احمد صدیقی نے اس کھلی کچہری کے سیشن کی نظامت کی.
سوئی سدرن اپنے فرنچائز صوبوں سندھ اور بلوچستان کے طول و عرض میں پھیلے ہوئے، اپنے تمام علاقائی اور زونل دفاتر میں باقاعدگی سے کھلی کچہریوں کا انعقاد کرتا ہے جس کا مقصد صارفین کو اپنی شکایات کے اندراج کے لیے ایک شفاف پلیٹ فارم مہیا کرنا اور ان کے مسائل کو فوری طور پر حل کرنا ہے.
اس کچہری سیشن میں شرکت کے لیے، صارفین کو سوشل میڈیا پلیٹ فارمز کے ذریعے پہلے سے مطلع کیا جاتا ہے تاکہ وہ گوگل فارم کے ذریعے اپنی رجسٹریشن کروا سکیں.
صارفین کی پہلے سے رجسٹرڈ شناخت کی تصدیق کے بعد آڈیٹوریم میں ان کے استقبال اور رہنمائی کے لیے ہیڈ آفس کے ریسیپشن ایریا میں ایک سہولت کاؤنٹر قائم کیا جاتا ہے جو اُنکی معاونت کرتا ہے.