کراچی:سندھ مدرستہ الاسلام یونیورسٹی کے ڈائریکٹوریٹ آف اسٹوڈنٹس افیئرز اینڈ کونسلنگ نے اپنے یوتھ ڈویلپمنٹ سینٹر میں پاکستان آرٹس کونسل کراچی کے تعاون سے اپنے طلباء کے لیےایک ورچوئل تھیٹر ورکشاپ کاانعقاد کیا، جس میں کوسوو کے نیشنل تھیٹر کے آرٹسٹک ڈائریکٹر کشٹرم مہمتی نے طلباء کو مختلف پرفارمنسس کے ذریعے تھیٹر کے متعلق بنیادی معلومات اور تربیت دی۔
کشٹرم مہمتی پرفارمنگ آرٹ میں اپنی مہارت کے لیے مشہور ہے۔
ورکشاپ کو تخلیقی مشقوں میں طلباء کو شامل کرنے کے لیے ڈیزائن کیا گیا تھا، جس میں ورچوئل کرداروں کے ذریعے ٹیم ورک، اصلاح اور تعامل پر زور دیا گیا تھا۔ یہ ورچوئل تھیٹر ورکشاپ ایک متحرک تجربہ تھا جس نے طلباء کو باہمی تعاون اور تخلیقی ماحول میں اظہار خیال کرنے کی ترغیب دی۔ ورچوئل کردار نگاری اور تخیلاتی سرگرمیوں کے آمیزے نے ایونٹ کو سیکھنے کا ایک پرلطف تجربہ بنا دیا، جس سے طلباء کے اعتماد اور ابلاغ کی مہارت میں اضافہ ہوا۔
سندھ مدرستہ الاسلام یونیورسٹی کے وائس چانسلر ڈاکٹر مجیب صحرائی نے اس موقع پر مہمان خصوصی کشٹرم مہمتی کی آمد کا شکریہ ادا کیا اور کہا کہ پرفارمنگ آرٹ زندگی کا عکاس ہے، اس لیے اس کی اہمیت کو دنیا بھر میں قبول کیا جاتا ہے۔
وائس چانسلر نے کہا کہ سندھ مدرستہ الاسلام یونیورسٹی اپنے طلباء کی تعلیمی سرگرمیوں سے لے کر ان کی ہم نصابی سرگرمیوں تک تعلیم ور تربیت کو اہمیت دیتی ہے۔ ایس ایم آئی یو کی طلباء کی سوسائٹیز بھی موجود ہیں جن میں آرٹ سوسائٹی بھی شامل ہے جو طلباء کے لیے مختلف سیکھنے اور تربیتی سیشنز کا انعقاد کرتی ہے۔
ڈاکٹر مجیب صحرائی نے مزید کہا کہ ہمیں اپنے اعلیٰ تعلیمی اداروں میں ادب، فن، موسیقی اور اس طرح کی دیگر سرگرمیوں کے ذریعے صحت مند کلچر کو فروغ دینا ہے۔ وائس چانسلر نے کامیاب ورکشاپ منعقد کرنے پر ایس ایم آئی یو کے ڈائریکٹر اسٹوڈنٹس افیئرز محمد نعیم احمد، طالب علم غلام رسول سومرو اور دیگر ٹیم ممبران کی کاوشوں کو بھی سراہا۔
اس موقع پر ڈاکٹر مجیب صحرائی نے مہمان کو سووینئرز اور ڈائریکٹر اسٹوڈنٹس افیئرز نے طلباء میں سرٹیفکیٹ تقسیم کئے۔