آزادی ایک نعمت ہے اور ہمیں اس پر فخر ہونا چاہئے: مرتضی وہاب

آزادی ایک نعمت ہے اور ہمیں اس پر فخر ہونا چاہئے: مرتضی وہاب

کراچی: مئیر کراچی بیرسٹر مرتضی وہاب نے فرئیر ہال میں تین روزسے جاری فیملی فیسٹول میں شرکت کی اس موقع پر ڈپٹی مئیر سلمان عبداللہ مراد، ایم ڈی سندھ سالڈ ویسٹ مینجمنٹ بورڈ طارق علی نظامانی و دیگر موجود تھے۔

مئیر کراچی نے اس موقع پر کہا کہ آزادی ایک نعمت ہے اور ہمیں اس پر فخر ہونا چاہئے دنیا میں بہت ساری قومیں آزادی کی اس نعمت سے محروم ہیں اور اس بات پر اور زیادہ فخر کرنا چاہئے کہ معیشت اور آبادی کے لحاظ سے پاکستان سے بڑا ملک جو اپنی معیشت پر ناز کرتا تھا پاکستان کی قوم نے متحد ہو کرچاہے فوجی میدان ہو، یا سفارتی میدان یا میڈیا کا میدان ہوہر جگہ مودی کو چاروں شانے چتِ کیا ہے۔

انہوں نے کہا یہ پاکستان کا جھنڈا ہے تو ہم ہیں اپنے گھروں پر، پارکوں گاڑیوں پر جھنڈا لگائیں ہمیں فخر ہے پاکستانی ہونے پر پاکستان نے ہمارے لئے بہت کچھ کر لیا اب وقت ہے کہ ہم اس ملک کے لئے کچھ کریں

ایک صحافی کے سوال پر انہوں نے جواب میں کہا کہ کیا لوگ اپنے کمرے میں اپنے گھر دفتر میں کچرا پھینکتے ہیں؟ یہ شہر بھی ہمارے گھر کی طرح ہے شہری کچراکھلے ایریا میں پھینکنے سے گریز کریں تاکہ کراچی شہر صاف ستھرا رہے انہوں نے کہا کہ سندھ سالڈویسٹ کا عملہ کچرا اٹھا رہا ہے اور صفائی کے کام میں بہت بہتری آئی ہے اگر شہری بھی تعاون کریں گے تو شہر کا ماحول خوشگوار اور صحت مند ہوگا۔

ایم ڈی سندھ سالڈ ویسٹ مینجمنٹ بورڈنے اس موقع پر کہا کہ یومِ آزادی کے موقع پر عہد کریں کہ ملک کی خدمت کریں گے اور ملک کی ترقی کے لئے اپنا کردار ادا کریں گے۔ ہمیں اپنے شہر کو صاف ستھرا رکھنے اور شجرکاری کو فروغ دینے کا عزم کرنا ہے۔

انہوں نے مزید کہا کہ ایسی تقریبات نہ صرف عوام کو ایک دوسرے کے قریب لاتی ہیں بلکہ قومی یکجہتی اور حب الوطنی کے جذبات کو بھی فروغ دیتی ہیں۔ تقریب کا مقصد نہ صرف آزادی کی خوشیاں منانا ہے بلکہ پاکستانی قوم اور افواج پاکستان کو خراج تحسین پیش کرنا بھی ہے جن کے حوصلے اور قربانیوں کی وجہ سے ہمیں فتح حاصل ہوئی اس معرکہ حق کی کامیابی کا جشن ایک نئے عزم جوش و جذبے کے ساتھ منایا جارہا ہے۔

فیریر ہال میں جاری فیملی فیسٹیول میں عوام کے لیے رنگا رنگ پروگرامزجاری ہیں اس کے علاوہ عوام میں ماحول دوست طرزِ زندگی، صفائی کی اہمیت اور شجرکاری کے فروغ کے لیے شہریوں کو ایک پودا مفت فراہم کیا جا رہاہے۔علاوہ ازیں ایونٹ کے دوسرے مرحلے میں 11 سے 13 اگست تک شاہراہِ قائدین پر ایک خوبصورت پکچر گیلری سجائی جائے گی، جس میں پاکستان کے ہیروز اور شہداء کو خراجِ تحسین پیش کیا جائے گا۔ اس کے علاوہ پرچم کشائی، ملی نغمے، فائر ورکس اور جشن آزادی سے متعلق سرگرمیاں بھی منعقد کی جائیں گی۔