چیئرمین منگھوپیر ٹاؤن کی ہدایت پر نالوں کی صفائی اور نکاسی آب کا جامع آپریشن شروع کیا گیا
کراچی: بارش کے باعث منگھوپیرٹاؤن کے علاقے یوسی 14 میں عوامی مشکلات کے پیشِ نظر ٹاؤن میونسپل کارپوریشن منگھوپیر کی جانب سے رین ایمرجنسی نافذ کرتے ہوئے نالوں کی صفائی اور نکاسیٔ آب کا ایک جامع، مربوط اور مؤثر آپریشن شروع کیا گیا۔ اس ہنگامی آپریشن کی قیادت چیئرمین منگھوپیر ٹاؤن حاجی نواز علی بروہی نے خود فیلڈ میں موجود رہ کر کی اور وہ رات گئے تک علاقے میں ڈٹے رہے، جب تک نالوں کی مکمل صفائی اور پانی کی روانی بحال نہ ہو گئی۔
چیئرمین منگھوپیر ٹاؤن نے بارش کے دوران مختلف گلیوں، سڑکوں اور نشیبی علاقوں کا تفصیلی معائنہ کیا، بھاری مشینری کے ذریعے نالوں سے کچرا، مٹی اور ملبہ نکلوانے کے عمل کی خود نگرانی کی اور ہر مقام پر کام کے معیار، رفتار اور تسلسل کو یقینی بنایا۔ انہوں نے واضح ہدایات دیں کہ بارش کے پانی کی نکاسی میں کسی بھی قسم کی سستی، لاپرواہی یا کوتاہی ہرگز برداشت نہیں کی جائے گی اور جب تک کام مکمل نہ ہو، تمام افسران اور عملہ فیلڈ میں موجود رہیں گے۔
اس موقع پر ڈسٹرکٹ ویسٹ پاکستان پیپلز پارٹی کے سینئر نائب صدر صدیق اکبر، میونسپل کمشنر منگھوپیر ٹاؤن احمد یار، وائس چیئرمین منگھوپیر ٹاؤن رانا محمد عارف سمیت ٹاؤن کے متعلقہ افسران بھی موجود تھے، جنہوں نے چیئرمین کو صفائی و نکاسیٔ آب کے انتظامات پر بریفنگ دی۔ چیئرمین منگھوپیر ٹاؤن نے موقع پر ہی متعدد مسائل کی نشاندہی کرتے ہوئے فوری احکامات جاری کیے اور اضافی مشینری و عملہ تعینات کرنے کی ہدایت دی تاکہ کسی بھی ہنگامی صورتحال سے بروقت نمٹا جا سکے۔
حاجی نواز علی بروہی نے اس موقع پر کہا کہ منگھوپیر ٹاؤن کے عوام کی حفاظت، سہولت اور ریلیف ان کی اولین ترجیح ہے، اور وہ صرف ہدایات دینے پر اکتفا نہیں کرتے بلکہ خود فیلڈ میں موجود رہ کر کام مکمل کرواتے ہیں۔ انہوں نے کہا کہ بارشوں کے دوران عوام کو تنہا نہیں چھوڑا جائے گا اور ٹاؤن انتظامیہ 24 گھنٹے الرٹ رہے گی۔
رات گئے تک جاری رہنے والے اس رین ایمرجنسی آپریشن کے نتیجے میں یوسی 14 کے مختلف علاقوں میں پانی کی روانی مکمل طور پر بحال کر دی گئی، نشیبی مقامات سے پانی کا اخراج ممکن بنایا گیا اور علاقے میں صورتحال کو قابو میں لے لیا گیا۔ علاقہ مکینوں نے چیئرمین منگھوپیر ٹاؤن حاجی نواز علی بروہی کی ذاتی نگرانی، عملی قیادت اور مسلسل فیلڈ میں موجودگی کو سراہتے ہوئے کہا کہ ایسی قیادت ہی عوام کے اعتماد کی اصل علامت ہوتی ہے۔