مومن آباد ٹاؤن کی یوسی 4 میں ترقیاتی منصوبوں کا آغاز
کراچی: مومن آباد ٹاؤن میں ترقی اور عوامی خدمت کے نئے باب کا سفر جاری ہے۔ ٹاؤن چیئرمین ملک عارف اعوان نے پارلیمانی لیڈر بلدیہ عظمیٰ کراچی اسد امان اللہ اور سینئر افسر مومن آباد ٹاؤن سید زین علی شاہ کے ہمراہ یوسی نمبر 4 مومن آباد میں جاری ترقیاتی کاموں کا تفصیلی معائنہ کیا۔
معائنے کے دوران سڑکوں کی تعمیر، سیوریج لائنوں کی درستگی، اسٹریٹ لائٹس کی تنصیب، گلیوں کی صفائی، نکاسی آب کے نظام کی بہتری اور مین ہول کورز کی تبدیلی سمیت متعدد منصوبوں کا جائزہ لیا گیا۔
تمام کاموں کی رفتار، معیار اور مٹیریل کا بغور معائنہ کیا گیا جبکہ متعلقہ افسران کو سختی سے ہدایت دی گئی کہ کسی بھی مقام پر معیار پر سمجھوتہ نہ کیا جائے۔
ٹاؤن چیئرمین ملک عارف اعوان نے موقع پر گفتگو کرتے ہوئے کہا: مومن آباد ٹاؤن کے عوام نے ہم پر اعتماد کیا ہے اور ہم اس اعتماد پر پورا اترنے کے لیے دن رات کوشاں ہیں۔ ترقیاتی منصوبوں کا مقصد صرف سڑکوں کی تعمیر نہیں بلکہ عوامی معیارِ زندگی کو بہتر بنانا ہے۔ ہم شفافیت، رفتار اور پائیداری پر مکمل یقین رکھتے ہیں۔”
انہوں نے مزید کہا کہ ماضی میں نظرانداز کیے گئے علاقے اب ترجیحی بنیادوں پر ترقی کے سفر میں شامل کیے جا رہے ہیں۔ ہمارا مقصد صرف منصوبے مکمل کرنا نہیں بلکہ عوام کو ان کے حقوق اور سہولیات بہم پہنچانا ہے۔ پارلیمانی لیڈر بلدیہ عظمیٰ کراچی اسد امان اللہ نے کہا کہ یوسی 4 مومن آباد ٹاؤن میں تمام ترقیاتی منصوبے میری کوششوں اور مئیر کراچی مرتضی وہاب صدیقی کے اقدامات سے شروع کیے گئے ہیں۔ ہم نے ان علاقوں پر توجہ دی ہے جہاں برسوں سے عوام بنیادی سہولتوں سے محروم تھے۔ اب ہر گلی، ہر محلے میں ترقی کی روشنی پہنچے گی انہوں نے کہا کہ بلدیاتی نمائندے اگر نیت اور دیانتداری سے کام کریں تو کوئی کام ناممکن نہیں۔ ہماری پوری ٹیم عوام کے ساتھ ہے، ان کی مشکلات کا ادراک ہے، اور انہیں حل کرنے کے لیے عملی اقدامات جاری ہیں اس موقع پر سید زین علی شاہ نے کہا کہ
"چیئرمین ملک عارف اعوان اور پارلیمانی لیڈر اسد امان اللہ کی واضح ہدایات کے مطابق تمام ترقیاتی منصوبوں کی نگرانی فیلڈ سطح پر کی جا رہی ہے۔ کام کی رفتار اور معیار دونوں پر کوئی سمجھوتہ نہیں ہوگا۔ متعلقہ افسران کو ہدایت دی گئی ہے کہ روزانہ کی بنیاد پر رپورٹ پیش کریں اور کسی بھی تاخیر پر فوری ایکشن لیا جائے۔”
معائنے کے دوران ٹاؤن چیئرمین اور پارلیمانی لیڈر نے علاقے کے معززین، تاجروں، اور مکینوں سے بھی ملاقات کی۔
علاقہ مکینوں نے اسد امان اللہ کی کوششوں کو سراہتے ہوئے کہا کہ ان کی دلچسپی اور عملی اقدامات سے برسوں سے رکے ہوئے ترقیاتی منصوبے دوبارہ شروع ہوئے ہیں۔
شہریوں نے کہا کہ حالیہ ہفتوں میں صفائی، سڑکوں کی بہتری، اور روشنی کے انتظامات میں واضح بہتری آئی ہے جس کا براہِ راست فائدہ عوام کو پہنچ رہا ہے۔
آخر میں ملک عارف اعوان نے کہا کہ یہ تو ابھی شروعات ہے، ہم مومن آباد ٹاؤن کو ایک مثالی علاقہ بنانے کے لیے پرعزم ہیں۔ عوام کا تعاون ہمارے حوصلے کو بڑھاتا ہے۔ انشاءاللہ ترقی کا یہ سفر رکے گا نہیں — یہ جاری رہے گا اور مزید تیز ہوگا۔”