لاڑکانہ: شہید محترمہ بینظیر بھٹو میڈیکل یونیورسٹی (SMBBMU) لاڑکانہ اور COMSTECH اسلام آباد کے درمیان صحت، تحقیق، مصنوعی ذہانت، ٹیکنالوجی، اور جدت کے شعبوں میں تعاون کو فروغ دینے کے لیے ایک مفاہمتی یادداشت (MoU) پر دستخط کیے گئے۔
شہید محترمہ بینظیر بھٹو میڈیکل یونیورسٹی کے پریس ترجمان نے اپنے جاری کردہ بیان میں کہا ہے کہ یہ معاہدہ مشترکہ تعلیمی اور سائنسی تحقیقی پروگراموں، طلبہ و اساتذہ کے تبادلوں، اور OIC کے رکن ممالک کے طلبہ و محققین کے لیے مواقع فراہم کرنے کے لیے کیا گیا۔
اسلام آباد میں SMBBMU کے وائس چانسلر پروفیسر ڈاکٹر نصرت شاہ اور COMSTECH کے کوآرڈینیٹر جنرل پروفیسر ڈاکٹر محمد اقبال چوہدری نے دستخط کیے
جبکہSMBBMU کے ORIC ڈائریکٹر پروفیسر میر حسن کھوسو اور COMSTECH کے پروگرام مینیجر مسٹر حارث اکرم بھی اس موقع پر موجود تھے۔
دونوں ادارے مشترکہ طور پر ورکشاپس، کانفرنسز، اور تربیتی پروگراموں کا انعقاد کریں گے تاکہ تعلیمی سرگرمیوں اور کلینیکل سروسز کو OIC ممالک میں فروغ دیا جا سکے۔ COMSTECH، SMBBMU میں جدید ترین مصنوعی ذہانت کا مرکز اور موسمیاتی تبدیلی کے مطالعے کے لیے ایک اور مرکز قائم کرنے میں مدد فراہم کرے گا اور SMBBMU کے فیکلٹی ممبران اور پوسٹ گریجویٹس کے لیے تحقیقی فیلوشپس بھی مہیا کرے گا۔ جبکہ SMBBMU، OIC ممالک کے ہیلتھ کیئر فراہم کنندگان کے لیے تربیتی ورکشاپس اور مختصر کورسز فراہم کرے گا اور اپنے فیکلٹی ممبران اور طلبہ کو OIC ممالک میں کلینیکل خدمات کے لیے بھیجے گا۔
یہ شراکت داری جدید ٹیکنالوجی، سائنسی تحقیق، اور جدت کے ذریعے صحت کی خدمات کو بہتر بنانے اور SMBBMU، COMSTECH اور OIC کے رکن ممالک کے درمیان تعلیمی تعلقات کو مستحکم کرنے کے لیے کی گئی ہے۔ پروفیسر شاہ اور پروفیسر چوہدری نے اس عزم کا اظہار کیا کہ وہ صحت کی فراہمی کو بہتر بنانے اور افریقہ اور مشرق وسطیٰ کے غریب ترین ممالک کے عوام کی زندگیوں کو سنوارنے کے لیے مشترکہ طور پر کام کریں گے۔