کراچی: ٹاؤن میونسپل کارپوریشن منگھوپیر کے چیئرمین حاجی نواز علی بروہی نے 25 دسمبر کے حوالے سے کرسمس کی تیاریوں کے سلسلے میں مختلف چرچز کا دورہ کیا۔ اس موقع پر انہوں نے کرسمس کی اہمیت پر روشنی ڈالی اور مسیحی برادری کے ساتھ اپنی حمایت اور تعاون کا یقین دلایا۔
چیئرمین نے کہا کہ کرسمس محبت، امن اور بھائی چارے کا پیغام دیتا ہے، اور ہم سب کو اس موقع پر یکجہتی کا مظاہرہ کرنا چاہیے۔ انہوں نے کرسمس کی تقریبات کو خوشگوار اور پُرامن بنانے کے لیے میونسپل انتظامیہ کی جانب سے بھرپور تعاون کی یقین دہانی کرائی۔
چیئرمین نے اپنے خطاب میں کہا کہ مسیحی برادری پاکستان کا اہم حصہ ہے، اور ان کے مذہبی تہواروں کو عزت و احترام کے ساتھ منانا ہماری اجتماعی ذمہ داری ہے۔ انہوں نے چرچز کی تزئین و آرائش اور صفائی ستھرائی کے حوالے سے کیے جانے والے اقدامات پر تفصیل سے بات کی اور متعلقہ حکام کو ہدایت کی کہ تمام سہولیات بروقت فراہم کی جائیں۔
مزید برآں، انہوں نے چرچز کی سیکورٹی کا جائزہ لیا اور یقین دلایا کہ کرسمس کی تقریبات کے دوران فول پروف سیکیورٹی یقینی بنائی جائے گی تاکہ مسیحی برادری اپنی عبادات اور تقریبات سکون سے انجام دے سکیں ۔
انہوں نے مسیحی رہنماؤں سے ملاقات کے دوران کہا کہ کرسمس کا تہوار امن، محبت اور بھائی چارے کا پیغام دیتا ہے اور ہمیں چاہیے کہ ہم ان اقدار کو فروغ دیں تاکہ ایک مضبوط اور خوشحال معاشرہ تشکیل دیا جا سکے۔ چیئرمین نے کرسمس کی پیشگی مبارکباد بھی دی اور تمام افراد کے لیے نیک خواہشات کا اظہار کیا۔
اس موقع پر ان کے ہمراہ میونسپل کمشنر آغا خلیق، ڈسٹرکٹ ویسٹ کے انفارمیشن سیکرٹری علی اکبر کاچھیلو، وائس چیئرمین رانامحمد عارف، سپریڈنٹ انجینیئر حسن شیخ ،قائد حسب اختلاف حبیب اللہ سواتی، اقلیت ممبر اشرف گل،سپریڈنٹ انجینیئر فہد جمیل، ڈائریکٹر سینیٹیشن لیاقت صوبہ و دیگر بھی موجود تھے