فیلڈ مارشل عاصم منیر نے فوجی جوانوں اور افسران کے ساتھ عید الفطر منائی
فیلڈ مارشل عاصم منیر نے جوانوں اور افسران کے ساتھ عید الفطر گزارنے کے لیے کرم کا دورہ کیا۔
پاک فوج کے شعبہ تعلقات عامہ آئی ایس پی آر کے مطابق فیلڈ مارشل نے نماز عید فوجی جوانوں اور افسران کے ساتھ ادا کی۔
آئی ایس پی آر کا کہنا ہے کہ نماز کی ادائیگی کے بعد پاکستان کے پائیدار استحکام اور خوشحالی کے لیے دعا کی گئی، فیلڈ مارشل نے فوجیوں اور افسران کو عید کی مبارکباد پیش کی۔
آئی ایس پی آر کا کہنا ہے کہ فیلڈ مارشل نے فوجیوں کی غیرمتزلزل لگن، بلند حوصلے اور مثالی پیشہ ورانہ مہارت کو سراہا۔
فیلڈ مارشل عاصم منیر نے آپریشن غضب للحق کے دوران پاک فوج کی کامیابیوں کو سراہا۔
چیف آف ڈیفنس فورسز سید عاصم منیر نے علاقائی امن و استحکام کے عزم کا اعادہ کرتے ہوئے کہا کہ افغانستان سے سرگرم دہشت گردوں کو ملکی سلامتی کو نقصان پہنچانےکی اجازت نہیں دی جائےگی۔
فیلڈ مارشل سید عاصم منیر نے کہا کہ افغان سرزمین پاکستان کے خلاف دشمن عناصر کی سرگرمیوں کے لیے استعمال نہیں ہونی چاہیے۔
پاک فوج کے شعبہ تعلقات عامہ کا کہنا ہے کہ فیلڈ مارشل نے جوانوں کے جذبے اور ثابت قدمی پر فخر کا اظہار کرتے ہوئے ان کا حوصلہ بڑھایا۔