فتنہ الہندوستان کے دہشت گردوں کا انجام عبرتناک موت ہے:محسن نقوی
کوئٹہ: وفاقی وزیر داخلہ محسن نقوی نے کہا ہے کہ پاکستان دشمن عناصر کے لیے زمین تنگ کر دی گئی ہے اور فتنہ الہندوستان کے دہشت گردوں کا انجام عبرتناک موت ہے۔
کوئٹہ میں وزیر اعلیٰ بلوچستان میر سرفراز بگٹی کے ہمراہ امن و امان سے متعلق اعلیٰ سطحی اجلاس کی صدارت کرتے ہوئے محسن نقوی نے کہا کہ بھارتی اسپانسرڈ دہشتگردوں اور ان کے سہولت کاروں کو انجام تک پہنچایا جائے گا، ریاست کی رٹ کو چیلنج کرنے والوں سے آہنی ہاتھوں سے نمٹا جائے گا۔
اجلاس میں امن و امان کی مجموعی صورتحال، فتنہ الہندوستان کے خلاف جاری سیکیورٹی کارروائیاں، صوبائی ایکشن پلان پر عمل درآمد اور اس میں حائل رکاوٹوں کا تفصیلی جائزہ لیا گیا۔
اجلاس میں آئی جی پولیس، آئی جی ایف سی نارتھ، ڈی آئی جی سی ٹی ڈی، ڈی آئی جی اسپیشل برانچ، ڈی جی لیویز، محکمہ داخلہ اور قانون نافذ کرنے والے اداروں کے اعلیٰ حکام نے شرکت کی۔
اجلاس میں وزیر اعلیٰ بلوچستان میر سرفراز بگٹی نے سیکیورٹی اقدامات اور امن و امان کی تازہ صورتحال پر بریفنگ دی۔
وزیر داخلہ نے کہا کہ دہشتگردوں کو اب چھپنے کی جگہ نہیں ملے گی۔ پاکستان دہشتگردی کے مکمل خاتمے کے لیے پرعزم ہے اور اس جنگ میں وفاقی حکومت بلوچستان حکومت کے ساتھ مکمل تعاون جاری رکھے گی۔
سرفراز بگٹی کا کہنا تھا کہ ریاستی ادارے مکمل ہم آہنگی کے ساتھ بلوچستان میں قیام امن کے لیے سرگرم عمل ہیں اور سب ورژن و دہشتگردی میں ملوث عناصر کے خلاف کارروائیاں مزید تیز کر دی گئی ہیں۔
سرفراز بگٹی نے کہا کہ یہ جنگ صرف سیکیورٹی فورسز کی نہیں بلکہ پوری قوم کی جنگ ہے، اور ہم ہر قیمت پر امن قائم کریں گے۔
وفاقی اور صوبائی قیادت نے اس عزم کا اعادہ کیا کہ پاکستان دشمن عناصر کی کوئی گنجائش نہیں، اور سیکورٹی فورسز و عوام کی قربانیاں رائیگاں نہیں جائیں گی۔