خصوصی بچوں کے لیے بطور رضاکار ہر وقت حاضر ہوں: شرجیل انعام میمن
کراچی: سندھ کے سینئر وزیر اور صوبائی وزیر برائے اطلاعات،ٹرانسپورٹ و ماس ٹرانزٹ شرجیل انعام میمن نے کہا ہے کہ خصوصی بچوں کے لیے بطور رضاکار ہر وقت حاضر ہوں، ہمیں خصوصی بچوں کے لیے مزید اقدامات کرنے کی ضرورت ہے۔۔ انہوں نے کہا کہ اس پروجیکٹ کا کریڈٹ وزیراعلیٰ سندھ سید مراد علی شاہ کو جاتا ہے جنہوں نے اس سلسلے میں نمایاں اقدامات کیے ہیں۔
ڈی ایس پی سینٹر کی افتتاحی تقریب سے خطاب خطاب کرتے ہوئے شرجیل انعام میمن نے کہا کہ شاہراہ بھٹو کے ساتھ بھی زمین مختص کی گئی ہے جہاں وزیراعلیٰ سندھ اسٹیٹ آف دی آرٹ سہولیات قائم کرنا چاہتے ہیں تاکہ خصوصی بچوں کو مزید بہتر سہولیات فراہم کی جا سکیں۔
انہوں نے میڈیا سے اپیل کی کہ ٹی وی چینلز کو چاہیے کہ ان سنٹرز پر پروگرام نشر کریں کیونکہ اکثر منفی پہلو زیادہ دکھائے جاتے ہیں، یہاں کی صورتحال اور بچوں کو دیکھ کر وہ جذباتی ہوگئے ہیں۔ شرجیل انعام میمن نے آٹزم سینٹرز کے شاندار کام کو قابلِ تعریف قرار دیتے ہوئے کہا کہ میڈیا ان کے مثبت پہلوؤں کو اجاگر کرے تاکہ زیادہ سے زیادہ والدین آگاہ ہو سکیں۔
ان کا کہنا تھا کہ کئی والدین کو اب تک علم نہیں کہ ایسے مراکز موجود ہیں جہاں خصوصی بچوں کے لیے جدید علاج اور سہولیات فراہم کی جا رہی ہیں۔ انہوں نے کہا کہ ہر کام کے پیچھے اللہ پاک کی حکمت ہوتی ہے اور ہمیں خصوصی بچوں کے لیے مزید اقدامات کرنے کی ضرورت ہے۔
شرجیل انعام میمن نے بتایا کہ کراچی میں یہ تیسرا سنٹر فعال ہے اور بچوں کے علاج کے لیے جدید سہولیات ہونی چاہئیں۔ انہوں نے کہا کہ وزیراعلیٰ مراد علی شاہ نے صحت کے شعبے میں کئی نمایاں اقدامات کیے ہیں اور سندھ حکومت صحت کے شعبے میں انقلابی اقدامات کر رہی ہے۔ ان کا کہنا تھا کہ ملک میں تقریباً تین لاکھ بچے ڈاؤن سنڈروم کا شکار ہیں، جن کے لیے خصوصی مراکز کی ضرورت ہے۔