کراچی:لانڈھی ٹاؤن میں رنگوں کی بہار،سالانہ پھولوں کی شاندار نمائش کا افتتاح
لانڈھی ٹاؤن میں رنگوں کی بہار — سالانہ پھولوں کی شاندار نمائش کا افتتاح، سانحہ گل پلازہ کے شہداء کے لیے خصوصی دعا
لانڈھی ٹاؤن میں رنگوں اور خوشبوؤں سے سجی سالانہ پھولوں کی شاندار نمائش کا باوقار افتتاح امیرِ جماعتِ اسلامی کراچی منعم ظفر خان نے کیا۔ اس موقع پر چیئرمین عبدالجمیل خان، ٹی ایم سی سید امداد علی شاہ، وائس چیئرمین محمد عمران اور سماجی کارکن و سرپرستِ اعلیٰ فخرالہدیٰ عرفان بٹ بھی ان کے ہمراہ موجود تھے۔
نمائش میں مختلف اقسام کے دیدہ زیب اور خوش رنگ پھولوں کی دلکش سجاوٹ نے شہریوں کی بڑی تعداد کو اپنی جانب متوجہ کیا۔ اہلِ علاقہ، خواتین اور بچوں نے بھرپور شرکت کی اور اس کاوش کو صحت مند تفریح اور ماحولیاتی خوبصورتی کے فروغ کی جانب ایک مثبت قدم قرار دیا۔
اس موقع پر خطاب کرتے ہوئے منعم ظفر خان نے کہا “شہر کی خوبصورتی صرف عمارتوں سے نہیں بلکہ مثبت سرگرمیوں، سرسبز ماحول اور عوامی شرکت سے قائم ہوتی ہے۔ لانڈھی ٹاؤن میں ایسی تقریبات شہری زندگی میں امید، خوشی اور مثبت سوچ کو فروغ دیتی ہیں۔”
انہوں نے مزید کہا کہ شہریوں کو صاف اور سرسبز ماحول فراہم کرنا منتخب نمائندوں کی ذمہ داری ہے، اور اس سلسلے میں ہر ممکن اقدامات جاری رکھے جائیں گے۔
چیئرمین عبدالجمیل خان نے اپنے خطاب میں کہا “لانڈھی ٹاؤن کو ماڈل ٹاؤن بنانے کے لیے ترقیاتی کاموں کے ساتھ ساتھ ماحولیاتی بہتری پر بھی خصوصی توجہ دی جا رہی ہے۔ عوام کے تعاون سے ہم علاقے کو مزید خوبصورت اور مثالی بنائیں گے۔”
افتتاحی تقریب کے دوران سانحہ گل پلازہ کے شہداء اور زخمیوں کے لیے خصوصی دعا کی گئی۔ رہنماؤں نے متاثرہ خاندانوں سے اظہارِ یکجہتی کرتے ہوئے مطالبہ کیا کہ زخمیوں کے علاج اور متاثرین کی فوری بحالی کو یقینی بنایا جائے اور ذمہ داران کے خلاف قانون کے مطابق کارروائی عمل میں لائی جائے۔
تقریب کے اختتام پر اس عزم کا اظہار کیا گیا کہ لانڈھی ٹاؤن میں مثبت، تعمیری اور عوامی سرگرمیوں کا سلسلہ جاری رکھا جائے گا تاکہ شہریوں کو صاف، محفوظ اور خوشگوار ماحول فراہم کیا جا سکے۔