چیئرمین منگھوپیر ٹاؤن حاجی نواز علی بروہی کی صوبائی وزیر بلدیات سندھ سید ناصر حسین شاہ سے ملاقات
کراچی:چیئرمین منگھوپیر ٹاؤن حاجی نواز علی بروہی نے صوبائی وزیر بلدیات سندھ سید ناصر حسین شاہ سے ان کے دفتر میں ملاقات کی۔ ملاقات میں منگھوپیر ٹاؤن میں جاری ترقیاتی کاموں، سیوریج سسٹم کی بحالی، سڑکوں کی تعمیر و مرمت، اسٹریٹ لائٹس کی تنصیب، صفائی ستھرائی کے نظام کی بہتری، اور عوامی سہولیات کے منصوبوں پر تفصیلی گفتگو ہوئی۔
چیئرمین حاجی نواز علی بروہی نے صوبائی وزیر کو بتایا کہ منگھوپیر ٹاؤن میں عوامی توقعات کے مطابق تیز رفتاری سے ترقیاتی منصوبے جاری ہیں۔ انہوں نے کہا کہ “ہم ہر منصوبے کی خود نگرانی کرتے ہیں تاکہ شفافیت برقرار رہے اور عوام کو عملی سہولت میسر آئے۔” انہوں نے صوبائی وزیر سے درخواست کی کہ ٹاؤن کی بڑھتی ہوئی ضروریات اور منصوبوں کی وسعت کو دیکھتے ہوئے فنڈز میں اضافے کیا جائے تاکہ عوامی خدمت کے دائرہ کار کو مزید وسیع کیا جا سکے۔
اس موقع پر صوبائی وزیر بلدیات سید ناصر حسین شاہ نے حاجی نواز علی بروہی کے کاموں کو سراہتے ہوئے کہا کہ “منگھوپیر ٹاؤن کراچی کے ان علاقوں میں سے ہے جہاں حقیقی معنوں میں ترقی کا پہیہ تیزی سے گھوم رہا ہے۔ حاجی نواز علی بروہی ایک فعال، ایماندار اور عوام دوست چیئرمین ہیں جو خود فیلڈ میں موجود رہ کر ہر کام کی نگرانی کرتے ہیں — یہی رویہ عوامی اعتماد کو مضبوط کرتا ہے۔”
انہوں نے مزید کہا کہ صوبائی حکومت چیئرمین منگھوپیر ٹاؤن کی سفارشات کو قدر کی نگاہ سے دیکھتی ہے اور بلدیاتی اداروں کی کارکردگی بہتر بنانے کے لیے ہر ممکن تعاون جاری رکھے گی۔ سید ناصر حسین شاہ نے حاجی نواز علی بروہی کو شاباش دیتے ہوئے کہا کہ “آپ اسی جذبے اور رفتار کے ساتھ کام جاری رکھیں، حکومت سندھ آپ کے ساتھ ہے۔”
چیئرمین حاجی نواز علی بروہی نے بھی صوبائی وزیر کی تعریف کرتے ہوئے کہا کہ “سید ناصر حسین شاہ سندھ کے ان وزراء میں سے ہیں جو ہر سطح پر عوامی نمائندوں سے براہِ راست رابطے میں رہتے ہیں اور عملی طور پر بلدیاتی نظام کو مضبوط کرنے کے لیے دن رات کوشاں ہیں۔” انہوں نے کہا کہ “پاکستان پیپلز پارٹی کی قیادت، خصوصاً چیئرمین بلاول بھٹو زرداری کے وژن کے مطابق، ہم عوامی خدمت کو عبادت سمجھ کر انجام دے رہے ہیں اور ان شاء اللہ منگھوپیر ٹاؤن کو کراچی کے بہترین ٹاؤنز میں شامل کریں گے۔”
اس موقع پر پاکستان پیپلز پارٹی ضلعِ غربی کے صدر عابد حسین ستی، سنیئر نائب صدر صدیق اکبر انفارمیشن سیکرٹری علی اکبر کاچھیلو بھی موجود تھے جنہوں نے چیئرمین منگھوپیر ٹاؤن کی کارکردگی کی تعریف کی اور کہا کہ ان کے کام نے پارٹی اور عوام دونوں کا سر فخر سے بلند کر دیا ہے۔
ملاقات نہایت خوشگوار ماحول میں اختتام پذیر ہوئی، جہاں دونوں رہنماؤں نے اس عزم کا اظہار کیا کہ منگھوپیر ٹاؤن میں ترقی کا سفر مزید تیز رفتاری سے جاری رہے گا، اور عوام کو بہتر سہولیات کی فراہمی حکومت سندھ اور بلدیاتی قیادت کی اولین ترجیح رہے گی۔