حکومت سندھ اور ٹرانسپورٹرز کے درمیان مذاکرات کامیاب،احتجاج ختم کرنے کا فیصلہ
حکومت سندھ اور ٹرانسپورٹرز کے درمیان مذاکرات کامیاب ہوگئے، جس کے بعد ٹرانسپورٹرز نے احتجاج ختم کرنے کا فیصلہ کیا ہے۔
سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن سے کمشنر ہاؤس کراچی میں ٹرانسپورٹرز کے ایک وفد نے ڈمپر ایسو سی ایشن کے رہنماؤں حاجی یوسف اور جان عالم کی کی سربراہی میں ملاقات کی۔
ملاقات میں کمشنر کراچی سید حسن نقوی، سیکریٹری ٹرانسپورٹ اسد ضامن، کراچی پولیس چیف جاوید عالم اوڈھو اور دیگر افسران بھی موجود تھے۔
ملاقات کے موقع پر شرجیل انعام میمن نے حالیہ حادثے میں ہونے والے جانی نقصان پر گہرے رنج و غم کا اظہار کیا اور واقعے کے بعد ہونے والے پرتشدد واقعات کی شدید مذمت کی۔
انہوں نے کہا کہ سندھ حکومت ٹرانسپورٹرز کے جائز مسائل کو ترجیحی بنیادوں پر حل کرے گی، تاہم تشدد اور توڑ پھوڑ کسی مسئلے کا حل نہیں۔
انہوں نے یقین دہانی کرائی کہ آئندہ ایسے واقعات کی روک تھام کے لیے تمام فریقین کے ساتھ مل کر اقدامات کیے جائیں گے۔
شرجیل انعام میمن نے واضح کیا کہ جن افراد نے قانون ہاتھ میں لیا اور فسادات کو ہوا دی، ان کے خلاف انسداد دہشتگردی کے تحت مقدمات درج ہوں گے۔
اس موقع پر سینئر وزیر شرجیل انعام میمن نے ڈمپر مالکان کو ہدایت دی کہ ڈمپرز میں کیمرے، ٹریکر، انشورنس اور ڈرائیورز کا لائسنس لازمی بنایا جائے۔ مزید برآں، ٹرانسپورٹرز کے نقصان کے تعین کے لیے ایک کمیٹی بھی تشکیل دی جا رہی ہے۔