"معرکۂ حق” جشن آزادی کی مناسبت سے منگھوپیر ٹاؤن میں فٹبال ٹورنامنٹ کا انعقاد
کراچی: یومِ آزادی 14 اگست کی مناسبت سے منگوپیر ٹاؤن میں "معرکۂ حق” تقریبات کے تحت ایک شاندار فٹبال ٹورنامنٹ کا انعقاد کیا گیا، جس میں 8 ٹیموں نے حصہ لے کر اس قومی موقع کو مزید یادگار بنا دیا۔ اس ٹورنامنٹ کا بنیادی مقصد نوجوانوں کو صحت مند، مثبت اور تعمیری سرگرمیوں کی جانب راغب کرنا تھا۔
افتتاحی تقریب میں پاکستان پیپلز پارٹی ڈسٹرکٹ ویسٹ کے صدر عابد ستی، سابق صوبائی وزیر، کراچی ڈویژن کے سابق جنرل سیکریٹری اور موجودہ صدر پیپلز پارٹی ڈسٹرکٹ ساؤتھ جاوید ناگوری، ممبر صوبائی اسمبلی علی احمد جان، سیکرٹری ڈسٹرکٹ ویسٹ علی اکبر کا چلیو اور ناروے سے آئی ہوئی پاکستانی فٹبال ٹیم کے کوچ نے شرکت کی۔ بین الاقوامی سطح پر پاکستان کا نام روشن کرنے والے کوچ کو ان کی خدمات کے اعتراف میں خصوصی اعزاز سے نوازا گیا۔
اس موقع پر چیئرمین منگوپیر ٹاؤن حاجی نواز علی بروہی نے خطاب کرتے ہوئے کہا:
"ہماری نوجوان نسل ہمارے معاشرے کا روشن مستقبل ہے۔ ہم چاہتے ہیں کہ انہیں ایسے مواقع فراہم کیے جائیں جہاں وہ اپنی توانائیاں مثبت سرگرمیوں میں صرف کریں۔ فٹبال جیسے صحت مند کھیل نہ صرف جسمانی بلکہ ذہنی نشو و نما میں بھی اہم کردار ادا کرتے ہیں۔ منگوپیر ٹاؤن میں ایسے مزید ایونٹس کا انعقاد کیا جائے گا تاکہ ہماری یوتھ مزید فعال ہو۔”
انہوں نے مزید کہا کہ "کھیل صرف مقابلے نہیں ہوتے بلکہ یہ اتحاد، بھائی چارے، نظم و ضبط اور خود اعتمادی کی تعلیم دیتے ہیں۔ ٹورنامنٹ کی کامیابی یہ ظاہر کرتی ہے کہ منگوپیر ٹاؤن کی عوام اور قیادت نوجوانوں کی ترقی کے لیے یکجہتی کے ساتھ کام کر رہے ہیں۔”
تقریب کے اختتام پر تمام ٹیموں، کوچز اور نمایاں کارکردگی دکھانے والے کھلاڑیوں میں انعامات تقسیم کیے گئے اور ان کی شرکت کو سراہا گیا۔
علاقہ مکینوں اور معزز مہمانوں نے اس شاندار ایونٹ کے انعقاد پر ٹاؤن انتظامیہ اور چیئرمین حاجی نواز علی بروہی کو بھرپور خراجِ تحسین پیش کیا۔