ہمیں ڈاکٹر مجیب صحرائی کی قیادت میں اس یونیورسٹی کی شاندار پیش رفت کا اعتراف کرنا چاہیے:وزیراعلیٰ سندھ
کراچی: وزیراعلیٰ سندھ سید مراد علی شاہ نے سندھ مدرستہ الاسلام یونیورسٹی کے چھٹے کانووکیشن سے خطاب میں کہا ہے کہ سندھ مدرستہ الاسلام یونیورسٹی صرف ایک یونیورسٹی نہیں ہے۔ یہ ہمارے قومی فخر کی علامت ہے، جو قائداعظم محمد علی جناح اور دیگر بلند پایہ شخصیات کی مادر علمی بھی ہے۔ اس کی 140 سالہ پرانی میراث، جس کی بنیاد خان بہادر حسن علی آفندی نے رکھی تھی، ہمیں دانشمندی، حوصلے اور عوامی خدمت کی اقدار سے متاثر کرتی رہتی ہے۔
وزیر اعلیٰ سندھ نے کہا کہ وہ سمجھتے ہیں کہ یہ ایس ایم آئی یو کے فارغ التحصیل طلباء کے لیے عظیم دن ہے جنہوں نے اپنی تعلیم کو ممکن بنانے کے لیے اپنا خون اور پسینہ لگایا۔
وزیراعلیٰ سندھ نے گریجوئیشن کرنے والے طلباء سے کہا ”یہ آپ کا دن ہے۔ ہمیں ڈاکٹر مجیب صحرائی کی قیادت میں اس یونیورسٹی کی شاندار پیش رفت کا اعتراف کرنا چاہیے۔ وزیر اعلیٰ نے کہا کہ درحقیقت یہ بات انتہائی اہمیت کی حامل ہے کہ یہ یونیورسٹی پاکستان کے چند معیاری یونیورسٹیوں میں سے ایک ہونے کے ساتھ ان چند یونیورسٹیوں میں سے ایک بن گئی ہے جو مالیاتی خسارے سے نکل کر سرپلس تک پہنچ گئی ہے، خاص طور پر مہنگائی کے اس دور میں۔
وائس چانسلر، فیکلٹی، اسٹاف اور ایس ایم آئی یو کے پہلے پی ایچ ڈی ڈاکٹر عبداللہ ایوب خان کو مبارکباد دیتے ہوئے سید مراد علی شاہ نے کہا کہ جیسا کہ ڈاکٹر مجیب صحرائی نے شیئر کیا، ایس ایم آئی یونیورسٹی نے اپنے پوسٹ گریجویٹ پروگراموں کو ہموار کیا ہے اور پی ایچ ڈی کے حوالے سے اپنی ڈگری کے حصول میں تمام معیارات اور تقاضوں کو پورا کیا ہے، یہ ایک اہم سنگ میل ہے۔
انہوں نے مزید کہا کہ سرکاری اور نجی دونوں یونیورسٹیوں کو پی ایچ ڈی کی ڈگریاں دیتے وقت اعلیٰ ترین معیارات کو برقرار رکھنا چاہیے۔ پی ایچ ڈی نہ صرف اسکالر کی قابلیت بلکہ ایوارڈ دینے والے ادارے کی علمی سالمیت کی بھی عکاسی کرتا ہے، کہ جوہر میں، معیاری پی ایچ ڈی پروگرام ایک معیاری ادارے کی پہچان ہوتے ہیں، اور اعلیٰ تعلیم کے تمام درجوں میں عمدگی کے لیے اس عزم کو مستقل طور پر ظاہر کیا جانا چاہیے۔
فارغ التحصیل طلباء سے مخاطب ہوکر وزیر اعلیٰ سندھ نے کہا کہ آج کا دن آپ کی زندگی کے ایک باب کا اختتام اور دوسرے کا آغاز ہے۔ جیسے جیسے آپ آگے بڑھیں، چاہے وہ افرادی قوت میں ہوں، مزید پڑھائی، انٹرپرینیورشپ، یا عوامی خدمت، اپنے ساتھ وہ اقدار اور تعلیم لے کر جائیں جو آپ نے یہاں حاصل کی ہیں۔ آپ کی کامیابی سندھ کی کامیابی ہے اور آپ کے خواب پاکستان کی امنگیں ہیں۔
ایجوکیشن سٹی میں ایس ایم آئی یو کے قائم ہونے والے نئے کیمپس کا ذکر کرتے ہوئے سید مراد علی شاہ نے کہا کہ یہ جان کر خوشی ہوئی ہے کہ ایس ایم آئی یونیورسٹی ملیر میں اپنا نیا کیمپس شروع کرنے کے قریب ہے جو حکومت سندھ کی جانب سے مختص کردہ 100 ایکڑ اراضی پر واقع ہے۔ یہ ترقی نہ صرف معیاری اعلیٰ تعلیم تک رسائی کو بڑھانے کی جانب ایک اہم قدم ہے بلکہ یہ روزگار کے مواقع پیدا کرکے مقامی کمیونٹی کی سماجی و اقتصادی ترقی میں بھی معاون ثابت ہوگی۔ انہوں نے کہا کہ اس طرح کے اقدامات بالخصوص سندھ اور مجموعی طور پر پاکستان کی ترقی کو آگے بڑھانے میں اہم کردار ادا کرتے ہیں۔
سید مراد علی شاہ نے کہا کہ آئیے ہم سب مل کر ایک ترقی پسند، جامع اور علم سے چلنے والے صوبہ سندھ اور پاکستان کی تعمیر کے لیے کام کریں، جہاں مواقع پروان چڑھیں اور آنے والی نسلیں ہمت اور وژن کے ساتھ آگے بڑھیں۔
آخر میں انہوں نے اس کانووکیشن کو کامیاب بنانے کے لیے وائس چانسلر ڈاکٹر مجیب صحرائی کی قیادت میں فیکلٹی اور عملے کی کاوشوں کو سراہا۔ وزیراعلیٰ سندھ نے حکومت سندھ کی جانب سے اس تاریخی سندھ مدرستہ الاسلام یونیورسٹی کو مضبوط بنانے کے لیے مکمل تعاون کا یقین بھی دلایا۔
قبل ازیں ڈاکٹر مجیب صحرائی نے اپنے خطبہ استقبالیہ میں وزیراعلیٰ سندھ، گورنر سندھ محمد کامران خان ٹیسوری، چیئرمین ایچ ای سی، چیئرمین سی آئی ای سی، سیکریٹری یونیورسٹیز اینڈ بورڈز، مختلف یونیورسٹیوں کے وائس چانسلرز، سفارت کاروں، وفاقی محتسب اعلیٰ انشورنس سید ممتاز علی شاہ، کانووکیشن میں شریک دیگر مہمانوں، فیکلٹی، افسران اور گریجوئیٹنگ اسٹوڈنس کا شکریہ ادا کیا۔
ڈاکٹر مجیب صحرائی نے ایس ایم آئی یو کے پہلے پی ایچ ڈی عبداللہ ایوب خان اور ان کے سپروائزر پروفیسر ڈاکٹر آفتاب احمد شیخ کو مبارکباد دیتے ہوئے کہا کہ انہوں نے اگست 2020 میں اس تاریخی تعلیمی ادارے میں شمولیت اختیار کی تھی اور ابتدائی مرحلے میں ہی انہوں نے محسوس کیا تھا کہ یونیورسٹی کو تحقیقی کلچر میں فوری اصلاحات کی ضرورت ہے۔ وائس چانسلر نے کہا کہ اس کے بعد ریسرچ پالیسی میں اصلاحات کی گئیں اور پوسٹ گریجویٹ پروگرامز بشمول پی ایچ ڈی اور ایم ایس کے طالب علموں کی ترقی کی دوبارہ تشخیص کو ہموار کیا گیا۔
وائس چانسلر نے کہا کہ آج پہلی پی ایچ ڈی کی ڈگری دینے سے ہمارا خواب پورا ہو گیا ہے۔ اس کے علاوہ تقریباً 10 پوسٹ گریجویٹ طلباء اپنی پی ایچ ڈی مکمل کرنے کے آخری مرحلے میں ہیں۔
ڈاکٹر مجیب صحرائی نے کہا کہ گزشتہ دو سالوں سے ایس ایم آئی یو کو خسارے کے بجٹ والے ادارے سے سرپلس ادارے میں لایا گیا ہے۔ انہوں نے بالعموم حکومت سندھ کے شاندار کردار اور خاص طور پر وزیر اعلیٰ سید مراد علی شاہ کے عزم، وژن اور مدد کی تعریف کی جنہوں نے ہمیشہ سند ھ مدرسہ یونیورسٹی کی مدد کی ہے۔
ڈاکٹر مجیب صحرائی نے ڈگریاں حاصل کرنے والے تمام طلباء کو مبارکباد دی اور امید ظاہر کی کہ وہ اپنی مہارت اور قومی جذبے سے ملک و ملت کی خدمت کریں گے۔ انہوں نے گریجویشن کرنے والے طلباء کے والدین کو بھی ان کے خوابوں کی تکمیل پر مبارکباد پیش کی کیونکہ ان کے بیٹے/بیٹی نے اس تاریخی ادارے سے اعلیٰ تعلیم مکمل کی ہے۔