کراچی:چیئرمین منگھوپیر ٹاؤن، حاجی نواز علی بروہی نے اپنی روایتی عوامی خدمت کے جذبے کو برقرار رکھتے ہوئے یونین کونسل 1 ونگی گوٹھ اور یونین کونسل 2 غازی ولاز کا تفصیلی دورہ کیا۔ اس موقع پر ٹاؤن کا متعلقہ عملہ بھی ان کے ہمراہ موجود تھا، جنہوں نے موقع پر موجود رہ کر علاقے کی مجموعی صورتحال، خصوصاً سیوریج کے سنگین مسائل کا بغور جائزہ لیا۔
یہ علاقے طویل عرصے سے بنیادی سہولیات کی کمی کا شکار رہے ہیں، بالخصوص نکاسی آب کا نظام انتہائی خراب حالت میں تھا۔ گلیوں میں گندا پانی جمع رہتا، تعفن پھیلتا، اور مقامی مکین کئی طرح کی صحت و صفائی کی مشکلات میں گھرے رہتے۔ افسوس کی بات ہے کہ ماضی میں ان علاقوں کو مسلسل نظر انداز کیا گیا۔ عوام کی آواز سنی تو ضرور گئی، لیکن عملی اقدامات کا فقدان ہمیشہ برقرار رہا، جس کا خمیازہ عوام کو بھگتنا پڑا۔
چیئرمین حاجی نواز علی بروہی نے دورے کے دوران علاقے کی گلیوں میں خود پیدل جا کر صورتحال کا مشاہدہ کیا، اہلِ علاقہ سے براہِ راست ملاقات کی، ان کے مسائل سنے اور ان کے احساسات کو سمجھا۔ مکینوں نے شکایت کی کہ برسوں گزر گئے مگر ان کے علاقے میں صفائی ستھرائی یا سیوریج نظام کی اصلاح کے لیے کوئی ٹھوس قدم نہیں اٹھایا گیا۔
اس موقع پر چیئرمین نے فوری ایکشن لیتے ہوئے موقع پر موجود افسران و عملے کو ہدایات جاری کیں کہ سیوریج لائنوں کی فوراً صفائی شروع کی جائے، جہاں لائنیں بوسیدہ ہو چکی ہیں وہاں نئی لائنیں ڈالی جائیں، اور نکاسی آب کے نظام کو جدید تقاضوں کے مطابق مکمل طور پر بحال کیا جائے تاکہ شہری سکون کا سانس لے سکیں۔
چیئرمین نواز علی بروہی نے عوام سے خطاب کرتے ہوئے کہا کہ اب وہ وقت ختم ہو چکا ہے جب ان علاقوں کو لاوارث سمجھا جاتا تھا۔ ہم یہاں صرف دورہ کرنے نہیں آئے بلکہ کام کرنے آئے ہیں۔ ہمارا مقصد عوامی مسائل کا مستقل حل ہے، اور ہمارا عزم ہے کہ وہ کام کریں جو ماضی میں نظر انداز کیے گئے۔ ہم وعدوں پر نہیں، عمل پر یقین رکھتے ہیں۔ انشاءاللہ، عوام کو واضح فرق نظر آئے گا۔
علاقہ مکینوں نے چیئرمین کی آمد کو خوش آئند اور امید افزا قرار دیتے ہوئے کہا کہ پہلی بار ایسا ہوا ہے کہ کوئی نمائندہ ان کے دروازے پر آیا، ان کے ساتھ بیٹھا، ان کی بات سنی اور فوری احکامات بھی جاری کیے۔ لوگوں نے اطمینان کا اظہار کرتے ہوئے کہا کہ اب انہیں محسوس ہو رہا ہے کہ ان کا علاقہ بھی کسی کی ترجیح میں شامل ہے۔
اپنے بیان میں چیئرمین نواز علی بروہی نے اس عزم کا اظہار کیا کہ منگھوپیر ٹاؤن کا ہر علاقہ ان کے لیے یکساں اہمیت رکھتا ہے۔ کسی بھی یونین کونسل کو پیچھے نہیں چھوڑا جائے گا۔ جب تک وہ عوامی اعتماد کے ساتھ اپنی ذمہ داریوں پر موجود ہیں، ان کا ہر لمحہ عوام کی خدمت کے لیے وقف ہے۔ صاف ستھرا ماحول، صحت بخش فضا، بہتر انفراسٹرکچر اور عوامی سہولیات کی فراہمی ان کی اولین ترجیح ہے، اور اس مشن پر کوئی سمجھوتہ نہیں ہوگا۔
یہ دورہ محض ایک رسمی کاروائی نہیں، بلکہ ایک عملی پیغام تھا کہ منگھوپیر ٹاؤن کی قیادت اب متحرک ہے، فعال ہے اور ہر سطح پر موجود ہے۔ اس دورے نے علاقے کے باسیوں کے دلوں میں نئی امید پیدا کی ہے اور انہیں یقین دلایا ہے کہ اب ان کے مسائل سنے بھی جائیں گے اور حل بھی ہوں گے۔