وزیراعلیٰ سندھ سید مرادعلی شاہ نے ایکسپو سینٹر کراچی میں تین روزہ سندھ لائیو اسٹاک ایکسپو 2025 کا افتتاح کردیا
کراچی:وزیراعلیٰ کی آمد پر وزیر فشریز اینڈ لائیواسٹاک محمد علی ملکانی، سیکریٹری فشریز اینڈ لائیواسٹاک کاظم جتوئی اور دیگر نے استقبال کیا
وزیر فشریز اینڈ لائیواسٹاک محمد علی ملکانی، ایم پی اے آصف خان، سیکریٹری فشریز اینڈ لائیواسٹاک کاظم جتوئی اور دیگر موجود تھے
سید مراد علی شاہ نے سندھ لائیو اسٹاک ایکسپو 2025ء کا دورہ کیا
سندھ لائیو اسٹاک ایکسپو میں 2000 جانور اور 1000 سے زائد پرندے، 11 اقسام کی کیٹل، دو اقسام کی بفیلو، 17 اقسام کی بکریاں، 4 اقسام کی بھیڑ، 5 اقسام کے گھوڑے، 2 اقسام کے اونٹ، 3 اقسام کے سانپ، عقاب، کتے، بلی اور بہت سے رینگنے والے جانور شامل ہیں
تقریب سے خطاب کرتے ہوئے سید مراد علی شاہ کا کہنا تھا کہ یہ میرے لیے ایک اعزاز اور خوشی کی بات ہے کہ آپ کو سندھ لائیو اسٹاک ایکسپو 2025 میں خوش آمدید کہوں، جو کہ سندھ لائیو اسٹاک اینڈ فشریز ڈیپارٹمنٹ کی جانب سے منعقد کیا جانے والا ایک تاریخی ایونٹ ہے۔ اس سال کے سندھ لائیو اسٹاک ایکسپو کا موضوع "ایک دوسرے کے ساتھ تعاون کریں اور ترقی کریں” ہے۔ سندھ لائیو اسٹاک ایکسپو کا مقصد تمام اسٹیک ہولڈرز، بشمول اکیڈمیا کو ایک پلیٹ فارم پر اکٹھا کرنا ہے تاکہ اس نظرانداز کیے جانے والے شعبے کی اہمیت کو اجاگر کیا جا سکے اور اس کی ترقی کے لیے تعاون اور آگاہی کو فروغ دیا جا سکے۔
ان کا کہنا تھا کہ یہ ایونٹ مختلف سرگرمیوں کا مجموعہ ہے، جن میں مویشیوں کی نمائش، فینسی برڈ ایگزیبیشن، پالتو جانور اور فشریز/آبی زراعت کی نمائش، جانوروں کے مقابلے، روایتی کھیل، اور بینکوں اور مالیاتی اداروں کے شرکاء کے ساتھ رابطے کے مواقع شامل ہیں۔
وزیراعلیٰ سندھ نے کہا کہ سندھ لائیو اسٹاک ایکسپو صرف ایک نمائش سے کہیں بڑھ کر ہے۔ یہ ایک متحرک پلیٹ فارم کے طور پر کام کرتا ہے جو جدیدیت کی نمائش، معلومات کے تبادلے، اور تعاون کو فروغ دیتا ہے۔ ایڈوانس لائیو اسٹاک کیئر تکنیکوں سے لے کر جدید فارمنگ کے طریقوں اور جدید فشریز کی جدت تک، یہ ایونٹ ان اہم صنعتوں میں ہونے والی تازہ ترین ترقی کا عکس پیش کرتا ہے۔
ان کا کہنا تھا کہ SLE-25 میں کانفرنسز اور سیمینارز بھی منعقد کیے جائیں گے، جن میں جدید تحقیق پیش کی جائے گی۔ ان سیشنز میں قومی اور بین الاقوامی محققین شرکت کریں گے، جس سے معلومات کے تبادلے اور جدت کو فروغ ملے گا۔ مزید برآں، یہ ایکسپو سندھی ثقافت کا جشن مناتے ہوئے قومی اور بین الاقوامی سطح پر روایتی کھیلوں اور ثقافتی مظاہروں کو بھی متعارف کروائے گا۔
سید مراد علی شاہ نے کہا کہ سندھ لائیو اسٹاک ایکسپو اسٹیک ہولڈرز، بشمول کسانوں، تاجروں، محققین، اور سرمایہ کاروں کے لیے ایک مرکز کے طور پر کام کرتا ہے تاکہ وہ تعاون کریں اور ترقی کریں۔ یہ عوامی اور نجی شعبے کے اسٹیک ہولڈرز، کسانوں اور کاروباری افراد کو ایک جگہ پر اکٹھا کرتا ہے۔نمائشوں اور سرگرمیوں کے علاوہ، یہ ایکسپو نیٹ ورکنگ اور شراکت داری کے مواقع فراہم کرتا ہے۔ تاجر، سرمایہ کار، اور انڈسٹری ایکسپرٹس نئے مواقع کی تلاش کے لیے اکٹھے ہو سکتے ہیں۔ مشہور مقررین کی سربراہی میں ہونے والے سیمینارز اہم موضوعات جیسے پائیدار زراعت، ویلیو چین ڈیولپمنٹ، اور عالمی منڈی کے رجحانات پر توجہ مرکوز کرتے ہیں۔یہ ایکسپو سندھ حکومت کی غربت کے خاتمے اور دیہی ترقی کے لیے غیر متزلزل عزم کو بھی اجاگر کرتا ہے۔ پائیدار زراعت اور ماہی گیری کے طریقوں کو فروغ دے کر، ہم سندھ بھر میں چھوٹے پیمانے کے کسانوں اور ماہی گیروں کی زندگیوں میں بہتری لانے کا عزم رکھتے ہیں۔ سبسڈیز، خصوصی تربیتی پروگرام، اور بنیادی ڈھانچے کی ترقی جیسی اہم اقدامات ہماری ان کوششوں کا حصہ ہیں۔
وزیراعلیٰ سندھ سید مرادعلی شاہ نے کہا کہ حلال گوشت کی برآمدات کی صلاحیت اور گوشت اور دودھ کی طلب اور پیداوار کے درمیان بڑھتے ہوئے فرق کے پیش نظر، سندھ سرمایہ کاری کے لیے ایک پرکشش مقام بنتا جا رہا ہے۔ سندھ حکومت نہ صرف فوڈ سیکیورٹی کے لیے بلکہ ویلیو چین میں اضافے کے لیے بھی لائیو اسٹاک سیکٹر کو فروغ دینے کے لیے پرعزم ہے۔ اس شعبے میں سرمایہ کاری کے لیے جدید گودام، سندھ کے ساحلی علاقوں میں جھینگے کی کاشت، اور فارم لیول پر کولڈ اسٹوریج کی سہولیات جیسے منصوبے تیار ہیں۔میں تمام نمائش کنندگان، تاجروں، کسانوں، انڈسٹری کے اسٹیک ہولڈرز، اور ہمارے ایونٹ مینیجر بدر ایکسپو کا تہہ دل سے شکریہ ادا کرتا ہوں کہ انہوں نے اس ایونٹ کو کامیاب بنانے میں فعال کردار ادا کیا۔ ہمارے معزز سفارت کاروں اور تجارتی زائرین کو خصوصی خوش آمدید — آپ کی موجودگی اس تجربے کو مزید بھرپور بناتی ہے اور بامعنی تعاون کی راہ ہموار کرتی ہے۔ مجھے یقین ہے کہ سندھ لائیو اسٹاک ایکسپو 2025 سندھ کے زراعت، لائیو اسٹاک، اور فشریز کے شعبوں میں جدت، شراکت داری، اور پائیدار ترقی کو فروغ دے گا۔ایک بار پھر اس دلچسپ ایونٹ کا حصہ بننے پر آپ کا شکریہ، خاص طور پر محکمہ زراعت، کھیل و امور نوجوانان، ثقافت، سیاحت، اور نوادرات کے منتظمین کا، اور مجھے امید ہے کہ آپ سب کو سندھ لائیو اسٹاک ایکسپو ایک بہت کامیاب اور یادگار تجربا رہے گا۔