کراچی: سندھ مدرستہ الاسلام یونیورسٹی کی کریکٹر بلڈنگ سوسائٹی کی جانب سے گذشتہ روز سینیٹ ہال میں ورلڈ ایمیچور ریڈیو ڈے کی مناسبت سے آگاہی کا دن منایا گیا۔ اس تقریب میں پاکستان ایمیچور ریڈیو سوسائٹی کراچی چیپٹر کے ممتاز اراکین نے شرکت کی۔ جن میں محمد سلمان، کاشف مختار، ریحان علی، جاوید مغل اور تیمورمغل شامل تھے۔ تقریب میں ایس ایم آئی یو کے فیکلٹی اور طلباء نے بھی شرکت کی۔
اس موقع پر خطاب کرتے ہوئے کریکٹر بلڈنگ سوسائٹی کے سرپرست اور ایس ایم آئی یو کے فیکلٹی ممبر باسط حسن نے قوم کی تعمیر میں اچھے کردار کی اہمیت پر زور دیا۔ انہوں نے کہا کہ ورلڈ ایمیچور ریڈیو ڈے ہر سال 18 اپریل کو دنیا بھر میں منایا جاتا ہے۔ اس سال کا تھیم "انسانی حفاظت سب کے لیے” تھا۔
انہوں نے کہا کہ ایمیچور ریڈیو کے آپریٹرز شوقیہ ریڈیو سروس کے ذریعے دوسرے لوگوں سے رابطہ کر کے کسی بھی ہنگامی صورتحال میں لوگوں کی مدد کر سکتے ہیں۔
پاکستان ایمیچور ریڈیو سوسائٹی کے ریجنل کوآرڈینیٹر محمد سلمان نے کہا کہ ہماری تنظیم شوقیہ ریڈیو کے استعمال کو فروغ دینے کے ساتھ ساتھ کسی آفت اور ہنگامی صورت حال میں شوقیہ ریڈیو آپریٹرز کو تیار کرنے کے لیے وقف ہے۔ انہوں نے کہا کہ ہمارے اراکین نے 2005 کے زلزلے کے ساتھ ساتھ 2010 کے سیلاب کے دوران بھی امدادی کوششوں میں حصہ لیا۔
محمد سلمان نے طلباء کے شوق کو آگے بڑھانے اور مختلف قومی اور بین الاقوامی شوقیہ ریڈیو مقابلوں اور تقریبات میں حصہ لینے کی ترغیب دی۔
انہوں نے یہ بھی بتایا کہ NASA کے پروگرام ARISS کے تحت ہر ہفتے ایک اسکول کا انتخاب کیا جاتا ہے تاکہ دنیا بھر کے طلباء شوقیہ ریڈیو ٹیکنالوجی کا استعمال کرتے ہوئے بین الاقوامی خلائی اسٹیشن کے عملے کے ارکان سے براہ راست بات کر سکیں۔
آگاہی سیشن کے بعد مختلف آلات کا عملی مظاہرہ کیا گیا، جیسے UHF اور VHF ریڈیو، جو عام طور پر شوقیہ ریڈیو آپریٹرز استعمال کرتے ہیں۔ طلباء کو آلات کے کام کو سمجھنے کے لیے آلات استعمال کرنے کی ترغیب دی گئی۔ ایس ایم آئی یو کے مختلف شعبہ جات کے طلباء نے اس تقریب میں شرکت کی اور ٹیکنالوجی کے استعمال میں گہری دلچسپی ظاہر کی۔
اس موقع پر PARS کراچی چیپٹر کے اراکین کو اسناد اور شیلڈز پیش کی گئیں اور حاضرین کو یادگاری بک مارکس پیش کیے گئے جو خاص طور پر تقریب کے لیے تیار کیے گئے تھے۔