محمد اورنگزیب اور گورنر اسٹیٹ بینک پاکستان کی فچ ریٹنگز کے نمائندوں سے ملاقات
وفاقی وزیرِ خزانہ سینیٹر محمد اورنگزیب اور گورنر اسٹیٹ بینک پاکستان نے بنکاک میں ورلڈ بینک گروپ اور آئی ایم ایف کے سالانہ اجلاسوں کے موقع پر فچ ریٹنگز کے نمائندوں سے ملاقات کی۔ ملاقات میں پاکستان کی معاشی کارکردگی اور خودمختار کریڈٹ ریٹنگ سے متعلق امور پر تبادلۂ خیال کیا گیا۔
وزیرِ خزانہ نے پاکستان کی بین الاقوامی سرمایہ منڈیوں تک بحال شدہ رسائی، مالیاتی استحکام اور مسلسل بنیادی مالیاتی سرپلسز کو اجاگر کیا۔
انہوں نے مہنگائی کے رجحانات، زری پالیسی، شرحِ مبادلہ کے استحکام اور جاری کھاتے کے محدود خسارے سے متعلق صورتحال بھی بیان کی۔ اس کے علاوہ زرمبادلہ کے ذخائر میں اضافے، مستقبل میں واجب الادا ادائیگیوں سے متعلق ذمہ داریوں میں کمی اور بیرونی مالیاتی تحفظات مضبوط ہونے پر بھی گفتگو ہوئی، جس سے پاکستان کی بیرونی معاشی دباؤ اور غیر متوقع حالات کا مقابلہ کرنے کی صلاحیت میں بہتری آئی ہے۔
پاکستانی وفد نے قرضوں کی ادائیگی کی صلاحیت میں بہتری، قرضوں پر سودی اخراجات میں کمی، قرض لینے کی مدت میں اضافے اور دوطرفہ قرضوں کی مدت میں توسیع سے متعلق یقین دہانیوں کو بھی اجاگر کیا۔ وفد نے آئی ایم ایف پروگرام کی تکمیل، ساختی اصلاحات پر عملدرآمد اور برآمدات پر مبنی ترقی کے فروغ کے عزم کا بھی اعادہ کیا۔
وزیرِ خزانہ نے امریکہ کے ساتھ تجارت اور سرمایہ کاری سے متعلق روابط پر بھی گفتگو کی اور فچ ریٹنگز سے ڈبل بی کریڈٹ ریٹنگ کے درجے تک پہنچنے کے لیے درکار شرائط کے بارے میں رائے طلب کی۔