منگھوپیر ٹاؤن میں ’’یومِ استحصالِ کشمیر‘‘ کے موقع پرتقریب،’’کشمیر بنے گا پاکستان‘‘ کے فلک شگاف نعرے
کراچی: 5 اگست ’’یومِ استحصالِ کشمیر‘‘ کے موقع پر محمد حسین بوائز سیکنڈری اسکول، سرجانی میں ایک نہایت پروقار، شاندار اور ملی جذبے سے سرشار تقریب منعقد کی گئی۔ چیئرمین ٹاؤن میونسپل کارپوریشن منگھوپیر، حاجی نواز علی بروہی نے تقریب میں بطور مہمانِ خصوصی شرکت کی تقریب کا آغاز تلاوتِ کلامِ پاک اور نعتِ رسولِ مقبول ﷺ سے کیا گیا، جس کے بعد اسکول کا پورا احاطہ ’’پاکستان زندہ باد‘‘، ’’پاک فوج زندہ باد‘‘ اور ’’کشمیر بنے گا پاکستان‘‘ کے فلک شگاف نعروں سے گونج اٹھا۔ تقریب میں شریک طلباء، اساتذہ، معزز مہمانوں اور ٹاؤن انتظامیہ نے بھرپور جوش و خروش کے ساتھ کشمیری عوام سے اظہارِ یکجہتی کرتے ہوئے اس عزم کا اعادہ کیا کہ پاکستانی قوم اپنے مظلوم کشمیری بھائیوں کے ساتھ ہر حال میں کھڑی ہے۔
تقریب کے دوران طلباء کو مسئلۂ کشمیر کی تاریخی، آئینی، قانونی اور بین الاقوامی حیثیت سے تفصیلی آگاہی فراہم کی گئی۔ مقررین نے مقبوضہ جموں و کشمیر میں بھارتی افواج کی جانب سے انسانی حقوق کی مسلسل پامالیوں، معصوم شہریوں پر مظالم، جبری گمشدگیوں، ماورائے عدالت قتل، اظہارِ رائے پر پابندیوں اور بنیادی انسانی آزادیوں کے سلب کیے جانے کے حوالے سے تفصیل سے روشنی ڈالی۔ طلباء کو بتایا گیا کہ 5 اگست 2019 کو بھارت نے یکطرفہ، غیر آئینی اور غیر قانونی اقدامات کے ذریعے مقبوضہ جموں و کشمیر کی خصوصی آئینی حیثیت ختم کرکے اقوامِ متحدہ کی قراردادوں اور بین الاقوامی قوانین کی کھلی خلاف ورزی کی، جس کے نتیجے میں وہاں ظلم و جبر کا ایک نیا باب شروع ہوا۔
مقررین نے اس بات پر زور دیا کہ نئی نسل کو مسئلۂ کشمیر کی تاریخی حقیقت، کشمیری عوام کی لازوال قربانیوں اور پاکستان کے اصولی مؤقف سے آگاہ کرنا وقت کی اہم ضرورت ہے تاکہ نوجوان نسل قومی شعور، حب الوطنی اور امتِ مسلمہ کے اجتماعی مسائل سے باخبر ہو کر مستقبل میں ملک و قوم کی بہتر انداز میں خدمت کر سکے۔
تقریب سے خصوصی خطاب کرتے ہوئے ٹاؤن میونسپل کارپوریشن منگھوپیر کے چیئرمین حاجی نواز علی بروہی نے کہا کہ یومِ استحصالِ کشمیر محض ایک یادگاری دن نہیں بلکہ پوری پاکستانی قوم کے اس غیر متزلزل عزم کی تجدید کا دن ہے کہ ہم اپنے کشمیری بھائیوں کو کبھی تنہا نہیں چھوڑیں گے۔ انہوں نے کہا کہ کشمیری عوام گزشتہ کئی دہائیوں سے بے مثال جرات، استقامت اور قربانیوں کے ساتھ اپنے حقِ خود ارادیت کی جدوجہد جاری رکھے ہوئے ہیں، اور ان کی یہ جدوجہد پوری دنیا کے مظلوم عوام کے لیے حوصلے، عزم اور استقلال کی روشن مثال ہے۔
انہوں نے کہا کہ بھارت ظلم، جبر، محاصروں اور ریاستی دہشت گردی کے ذریعے کشمیری عوام کے جذبۂ آزادی کو ہرگز ختم نہیں کر سکتا۔ ظلم ہمیشہ عارضی ہوتا ہے جبکہ حق اور انصاف کی فتح یقینی ہے۔ انہوں نے اس یقین کا اظہار کیا کہ وہ دن ضرور آئے گا جب کشمیری عوام اپنی آزاد سرزمین پر امن، وقار اور آزادی کے ساتھ زندگی بسر کریں گے۔
چیئرمین حاجی نواز علی بروہی نے عالمی برادری، اقوامِ متحدہ اور انسانی حقوق کی عالمی تنظیموں کے دوہرے معیار پر شدید افسوس کا اظہار کرتے ہوئے کہا کہ مقبوضہ کشمیر میں ہونے والی انسانی حقوق کی سنگین خلاف ورزیوں، ماورائے عدالت قتل، خواتین اور بچوں پر مظالم، سیاسی قیادت کی گرفتاریوں اور بنیادی آزادیوں کی مسلسل پامالی پر خاموشی کسی صورت قابلِ قبول نہیں۔ انہوں نے مطالبہ کیا کہ عالمی برادری اپنی ذمہ داریاں پوری کرے اور کشمیری عوام کو اقوامِ متحدہ کی قراردادوں کے مطابق ان کا بنیادی حقِ خود ارادیت دلانے کے لیے مؤثر کردار ادا کرے۔
انہوں نے مزید کہا کہ پاکستان ہمیشہ کی طرح ہر قومی، علاقائی اور بین الاقوامی فورم پر کشمیری عوام کا مقدمہ پوری قوت، دلائل اور ذمہ داری کے ساتھ اٹھاتا رہے گا۔ انہوں نے طلباء کو مخاطب کرتے ہوئے کہا کہ نوجوان نسل ملک کا روشن مستقبل ہے، لہٰذا انہیں چاہیے کہ وہ تعلیم، کردار، تحقیق اور شعور کے ذریعے دنیا بھر میں کشمیر کے مظلوم عوام کی آواز بنیں اور حق و انصاف کے فروغ میں اپنا مؤثر کردار ادا کریں۔
تقریب کے اختتامی مرحلے میں طلباء میں قومی پرچم تقسیم کیے گئے جبکہ یومِ استحصالِ کشمیر کی مناسبت سے خصوصی بیجز بھی آویزاں کیے گئے۔ طلباء نے ہاتھوں میں قومی پرچم تھام کر کشمیری عوام سے بھرپور یکجہتی کا اظہار کیا، ملی نغمے پیش کیے، قومی و کشمیری یکجہتی کے نعرے لگائے اور پرچم کشائی کی پروقار تقریب میں بھرپور جوش و جذبے کے ساتھ شرکت کی۔ اس موقع پر پورا ماحول حب الوطنی، قومی یکجہتی اور کشمیری عوام سے غیر متزلزل وابستگی کے جذبات سے سرشار نظر آیا۔
تقریب میں میونسپل کمشنر منگھوپیر آغا خالیق، وائس چیئرمین رانا محمد عارف، یونین کونسل نمبر 7 کے وائس چیئرمین حافظ عمران علی، محمد حسین بوائز سیکنڈری اسکول کے پرنسپل، اساتذۂ کرام، عملے اور طلباء کی کثیر تعداد نے شرکت کی۔ شرکاء نے اس عزم کا اعادہ کیا کہ پاکستانی قوم کشمیری عوام کی سیاسی، سفارتی اور اخلاقی حمایت ہر سطح پر جاری رکھے گی اور ان کے حقِ خود ارادیت کے حصول تک ہر ممکن آواز بلند کرتی رہے گی۔